Prezıdent: Jas depýtattardyń úlesi artqany qýantady

Foto: Aqorda

Bul týraly Prezıdent barlyq deńgeıdegi máslıhattar depýtattarynyń II respýblıkalyq forýmynda aıtty, dep habarlaıdy  qandastar.kz 

«Biz búgin máslıhattardyń jumysyna jáne mańyzdy máselelerge qatysty pikir almasamyz. Bárińizge málim, sońǵy jyldary elimizde jan-jaqty jańǵyrý jumystary qolǵa alyndy. Sonyń ishinde saıası reformalardyń orny bólek. 2022 jyly referendým arqyly Konstıtýııaǵa mańyzdy ózgerister engizdik. Parlamenttiń rólin aıtarlyqtaı kúsheıttik. Zań shyǵarýshy organnyń qazirgi qyzmetine Erlan Jaqanuly arnaıy toqtalyp ótti. Jalpy, bılik tarmaqtarynyń jumysyn jetildirý úshin naqty sharalar qabyldadyq. Onda jergilikti ókildi bılikke qatysty máseleler de bar. Atap aıtsaq, oblystyq máslıhat saılaýy aralas júıe arqyly ótedi. Al aýdandyq depýtattar tek qana majorıtarlyq tásilmen saılanady. Bul qadam elimizdiń demokratııalyq jolmen damýyna zor serpin berdi dep senimmen aıta alamyz», dedi Memleket basshysy.

Prezıdenttiń aıtýynsha reforma nátıjesi aıtarlyqtaı.

«Aýqymdy reformanyń nátıjesinde saıası báseke jandana tústi. Jańa erejege saı ótken saılaýdan keıin máslıhattarǵa jańa adamdar keldi. Alty saıası partııanyń ókilderi depýtat mandatyna ıe boldy. Qazir máslıhat músheleriniń onnan biri ǵana – partııalyq tizimmen kelgen depýtattar. Qalǵany – túgel bir mandatty okrýgten saılanǵan azamattar. О́zin-ózi usynǵan 434 adam depýtat atandy», dedi Prezıdent.

Qasym-Jomart Toqaev jastar týraly da toqtaldy.

«Ashyǵyn aıtsaq, buryn saıası partııalar túrli sanattaǵy azamattarmen jumysqa kóp kóńil bólmeıtin. Zańmen talap etkennen keıin ǵana mán bere bastady. Mysaly, partııalyq tizimde jastarǵa arnaıy kvota bólindi. Bul sheshim olardyń qoǵamdyq-saıası úderiske aralasýyna jol ashyp berdi. Buryn máslıhattaǵy jas azamattardyń úlesi 2 paıyzǵa da jetpeıtin. Qazir zańnamaǵa engizilgen ózgeristerdiń nátıjesinde bul kórsetkish eselep artty deýge bolady. Búgin de ortamyzda kóptegen jas depýtattar otyr. Olar túrli minberden jastarǵa qatysty ózekti máselelerdi batyl kóterip júr», dedi Memleket basshysy.