جاڭالىقتار
پرەزيدەنت «جۇمىسشى ماماندىقتارىنىڭ قالاسى» فەستيۆالىنە باردى
فوتو:Akorda
EXPO كورمە الاڭىندا بولاشاق مامانداردىڭ, جۇمىس بەرۋشىلەر مەن كاسىپتىك-تەحنيكالىق ۇيىمداردىڭ باسىن قوسقان «جۇمىسشى ماماندىقتارىنىڭ قالاسى» فەستيۆالى ءوتىپ جاتىر. بۇل – مەملەكەت باسشىسى قاسىم-جومارت توقاەۆتىڭ باستاماسىمەن جاريالانعان «جۇمىسشى ماماندىقتارى جىلىنداعى» العاشقى اۋقىمدى ءىس-شارا, دەپ جازدى qandastar.kz
فەستيۆال وقۋ-اعارتۋ مينيسترلىگىنىڭ ۇيىمداستىرۋىمەن جانە باسقا دا سالالىق ۆەدومستۆولاردىڭ, ۇلتتىق كومپانيالار مەن ءىرى كاسىپورىنداردىڭ قولداۋىمەن ءوتىپ جاتىر. قالاشىقتاعى 40 ينتەراكتيۆتى كورمەدە 200-دەن استام ماماندىقتىڭ قىر-سىرىنا قانىعىپ, ەكونوميكا سەكتورلارىنىڭ ەرەكشەلىكتەرىمەن تانىسۋعا بولادى. فەستيۆال اياسىندا بىرنەشە كۇن بويى ءتۇرلى سەمينارلار, شەبەرلىك ساعاتتارى, يننوۆاتسيالىق سەسسيالار مەن جۇمىس جارمەڭكەلەرى ۇيىمداستىرىلادى. العاشقى ەكى كۇندە ءىس-شاراعا 15 مىڭنان استام ادام كەلگەن.
قاسىم-جومارت توقاەۆ ەنەرگەتيكا, تاۋ-كەن, مەتاللۋرگيا, مۇناي-گاز, قۇرىلىس, اۋىل شارۋاشىلىعى جانە تاعى دا باسقا سالالارعا مامان دايارلاۋ ۇدەرىسىمەن تانىستى. سونداي-اق پرەزيدەنتكە ەڭبەك نارىعىنداعى سۇرانىسقا جانە ءار ءوڭىردىڭ ەرەكشەلىگىنە قاراي كاسىپتىك-تەحنيكالىق ءبىلىم بەرۋ ۇيىمدارىن ترانسفورماتسيالاۋ مىسالدارى باياندالدى.
پرەزيدەنت اتوم ەلەكتر ستانساسى سەكىلدى ءىرى جوبالاردى جۇزەگە اسىرۋ قارساڭىندا ساپالى ءبىلىم مەن كاسىبي داعدىنى مەڭگەرگەن ماماندار وتە قاجەت ەكەنىن ايتتى.
مەملەكەت باسشىسى «جۇمىسشى ماماندىقتارىنىڭ قالاسىن» ارالاپ كورگەن سوڭ وڭىرلەردەن كەلگەن جاستارمەن جۇزدەستى. پرەزيدەنت كەز كەلگەن ەڭبەك قادىرلى, قۇرمەتكە لايىق ەكەنىنە نازار اۋدارىپ, جاستاردى ايانباي ەڭبەك ەتۋگە شاقىردى
سونىمەن قاتار قاسىم-جومارت توقاەۆ ۋكراينا توڭىرەگىندەگى جاعداي تۋرالى پىكىر ءبىلدىرىپ, ەلىمىزدىڭ تىنىشتىعى مەن تۇراقتىلىعى ەڭ باستى قۇندىلىق ەكەنىنە نازار اۋداردى.
– ءبىز «بىرلىگىمىز – ارالۋاندىقتا» يدەولوگياسىن تەمىرقازىق ەتىپ ۇستانىپ وتىرمىز. ۇلتىمىز بەن نانىم-سەنىمىمىز ءارتۇرلى ەكەنىنە قاراماستان, ءبىر قوعامدا تۇتاس حالىق بولىپ ءومىر سۇرەمىز. مەن بارشاڭىزدى وسىناۋ تەرەڭ ۇدەرىستى تولىق تۇسىنۋگە شاقىرامىن. سوندا عانا تابىسقا جەتە الامىز. قازىر ۋكراينا جونىندە كوپ ايتىلىپ جاتىر. ءبىز العاشقى كەزدەن باستاپ وسى سوعىستى مىندەتتى تۇردە توقتاتۋ كەرەك, ديپلوماتيالىق كەلىسسوزدەر ارقىلى ءبىر مامىلەگە كەلۋ قاجەت دەپ ايتتىق. بۇل ۇستانىمىمىز ەندى شىندىققا اينالدى. ەكى الپاۋىت ەل ساياسي سۇحبات جۇرگىزە باستادى. بۇل – جاقسى ءۇردىس. ءارى قازاقستانعا پايداسىن تيگىزەدى. سوندىقتان ءبىز مۇنى مەيلىنشە قولدايمىز, – دەدى پرەزيدەنت.
