«Realǵa» jańa bapker kelmek

Madrıdtik «Realdyń» ańyz oıynshysy, sońǵy jyldardaǵy eń tabysty bapkerlerdiń biri Habı Alonso Santıago Bernabeýge qaıta oralady. Alaıda bul joly oıynshy emes, bas bapker retinde, dep jazady qandastar.kz saıty inbusiness.kz-ke silteme jasap. 

Bul týraly senimdi aqparat kózi Fabrııo Romano málimdedi. Onyń aıtýynsha, Alonso men madrıdtik klýb arasyndaǵy kelisimshart 2028 jyldyń jazyna deıin jasalǵan. Qarjylyq málimetter ázirge qupııa saqtalýda.

Karlo Anchelottı dáýiri aıaqtalýǵa jaqyn. Jyldar boıy klýbtyń ishki tártibin saqtap, «Realǵa» birneshe márte Chempıondar lıgasyn syılaǵan ıtalııalyq mamanmen qoshtasatyn sát te alys emes.

Alaıda komandanyń tizginin óz dáýirinde madrıdtik ujymda oınaǵan, klýbtyń tynys-tirshiligin ishten biletin Alonsoǵa berý – klýbtyń bolashaǵy úshin jasalǵan senimdi qadam. Habı Alonso 1 maýsymnan bastap qyzmetine resmı kirisip, AQSh-ta ótetin klýbtyq álem chempıonatynda (15 maýsym – 13 shilde) bapker retinde alǵashqy matchyna shyǵady.

Onyń sońǵy jumys orny Germanııanyń «Baıer» klýby fýtbol álemin tańǵaldyrǵan. Alonsonyń jetekshiligimen «Baıer» alǵash ret Býndeslıgany jeńip, el kýbogyn ıelenip, Eýropa lıgasynyń fınalyna deıin jetti. Eń bastysy – komanda bir maýsymda birde-bir jeńilissiz rekord ornatty.

Al «Realdy» osy ýaqytqa deıin basqarǵan Anchelottıdiń esimi jıi-jıi Brazılııa quramasymen baılanystyrylýda. Maýsym sońynda ol ulttyq qurama tizginin ustaýy múmkin degen boljamdar kúsheıip keledi.

Habı Alonsonyń «Realdaǵy» jańa dáýiri bastaldy. Onyń taktıkalyq sheberligi, oıynǵa degen kózqarasy men klýbqa degen adaldyǵy jańa jetistikterge jol ashary sózsiz. Madrıdte úlken úmit pen jańa tarıhtyń alǵashqy paraǵy jazylýǵa daıyn.