رەسەيدە «قازاقتان قىسىم كورگەن ورىس دەپۋتاتىنىڭ» وبرازى قالىپتاسۋدا — جۋرناليست

فوتو: ماجيليس 

دەپۋتات شاتالوۆتىڭ اڭداماي سويلەگەن ءسوزى قازاقستانعا قالاي سوقتىعارىن بىلمەي وتىرعان كرەملگە ازىق بولدى دەپ جازىپتى  Ertenmedia.kz.

جۋرناليست جانيا ۇرانقاەۆانىڭ پىكىرىنشە دەپۋتاتتىڭ ۋكراينا مەن ماسكەۋگە قاتىستى داۋلى مالىمدەمەسى مىنە, بىرنەشە كۇن بولدى رەسەي مەدياسىنىڭ كۇن تارتىبىنەن تۇسپەي تۇر… «ورىس پروپاگانداسى «شاتالوۆ قازاقتاردان قىسىم كورۋدە», «قازاق قوعامى قىسىمعا العان دەپۋتاتتىڭ مۇڭ-زارى…» دەگەن ماعىناداعى كونتەنتتى بىرىنەن-ءبىرى ءىلىپ اكەتىپ, توقتاۋسىز تاراتۋدا,  دەپ حابارلايدى qandastar.kz

ۋكراينا مەن رەسەي اراسىنداعى قانتوگىستىڭ ءتۇپ-توركىنى دە وسى اقپاراتتىق سوعىستان باستالعان. رەسەي تەلەارنالارى ونداعان جىل بويى كيەۆتى قۇبىجىق قىلىپ كورسەتىپ, جەككورۋشىلىك سەزىمىن ۇزدىكسىز قوزداتىپ كەلدى. ۋكراينا ءوز كەزەگىندە مۇنى «ماعىناسىز شوۋ» دەپ ساناپ, كوپ جاعدايدا ءۇنسىز قالاتىن. سونىڭ ناتيجەسىن بۇگىن بۇكىل الەم كورىپ وتىر. مۇندايدا ءۇنسىز قالۋ, ۇيدەن بالەدەن قۇتىلۋدى بىلدىرمەيدى. شاتالوۆتىڭ «ورىس بولعانىم ءۇشىن قىسىم كوردىم» دەگەن ءسوزى دە ءدال سول سۇرلەۋمەن جايىلىپ بارادى. ربك, ريا, لەنتا باسىلىمدارى بۇل تاقىرىپتى قاۋزاۋدان شارشار ەمەس. ولار شاتالوۆتى قۋعىن-سۇرگىن قۇربانى رەتىندە كورسەتۋدە.

ال ءبىزدىڭ مينيسترلىكتىڭ اقپاراتتىق ساياساتقا جاۋاپتى ورگاندارى بولسا, ءدال وسى ساتتە بۇعىپ, ىشكى تىرلىكپەن عانا اينالىسىپ, قاجەتسىز ەرەجەلەر مەن شەكتەۋلەردى ويلاپ تابۋمەن اۋرە. شىندىعىندا, ءدال قازىر اقپارمين ءدال وسى ماسەلەگە ارالاسۋى ءتيىس. مەملەكەتتىك ارنالار مەن سايتتار دەپۋتات شاتالوۆتى سۇحباتقا شاقىرىپ, سميرنوۆا سىندى تۇلعالاردى تارتىپ, اشىق الاڭ ۇيىمداستىرعانى ءجون. ولار ءوز كەزەگىندە قازاقتان ەشبىر قىسىم كورمەگەنىن, وسى ەلدە كويلەگى كوك, كوڭىلى توق, شالقىپ باسىپ ءومىر سۇرەتىنىن جاسىرماي ايتۋى كەرەك. اقيقاتى دا وسى عوي. اقپارات – قاۋىپتى قۇرال. كىشكەنتاي ءبىر ۇشقىننىڭ ءوزى ۇلكەن ورتكە ۇلاسۋى مۇمكىن ەكەنىن دالەلدەپ تۇرعان ۋكراينا مىسالى كوز الدىمىزدا. مەملەكەت دەڭگەيىندە رەسەيلىك مەديانىڭ ارانداتۋىنا سالعىرت قاراماي, ساۋاتتى جاۋاپ قاتاتىن ۋاقىت كەلدى. شاتالوۆ وقيعاسى ەسكەرتۋ. وسىنى ۇمىتپايىق».