Reseılik saıasatkerler Toqaevtyń saıasaty týraly aıta bastady

Foto: Aqorda

Prezıdent Qasym-Jomart Toqaevtyń syrtqy saıasat baǵyty álemdik arenada óz ornyn nyǵaıtyp, eldiń halyqaralyq qatynastarynda salmaqty ári turaqty ról atqarýda. Muny reseılik saıasattanýshy Vıtalıı Mlechın Gazeta.ru saıtyndaǵy maqalada atap ótti, dep jazady qandastar.kz.

Mlechınniń aıtýynsha, Toqaev — syrtqy isterde naqty ári salıqaly saıasat júrgizetin kóshbasshy. Onyń saıasaty salmaqty, boljamdy jáne kópvektorly sıpatqa ıe. Sonymen qatar, Toqaev Berlınde jasaǵan málimdemesinde Qazaqstannyń Reseımen tyǵyz yntymaqtastyq ornatýyn jalǵastyratynyn, elde “antıreseıshildik” ahýal joqtyǵyn alǵa tartqanyn aıqan.

Sarapshy Toqaevtyń “Qazaqstanda azamattar jeke qarym-qatynasta qandaı tilde sóıleý kerektigin óz erkimen tańdaýy tıis, eshkim olarǵa bul máselede qysym kórsetpeýi qajet” degen tilge qatysty ustanymyn da alǵa shyǵarady.

Sondaı-aq saıası sarapshy Konstantın Kalachev Qazaqstannyń kópvektorly saıasatynyń mánin túsindirip, ol eldiń strategııalyq odaqtastarymen qarym-qatynasynda eshqandaı qarama-qaıshylyq týǵyzbaıtynyn atap ótken. Kalachevtiń aıtýynsha, Qazaqstan halyqaralyq arenada óz táýelsizdigin saqtaı otyryp, Reseımen ári basqa da eldermen turaqty ári senimdi seriktestik ornatyp otyr.

Al saıasatker, Qazaqstan-Reseı baspasóz ortalyǵynyń sarapshysy Andreı Vypolzov ǵalamtorda keıde Astanany “seriktestik jolynan taıyp, Batysqa jaqyndap bara jatyr” dep aıyptaıtyn maqalalar shyǵyp júrgenin aıtty. Biraq ol bul pikirlerdiń shyndyqqa saı kelmeıtinin jetkizdi.

Qorytyndylaı kele, reseılik sarapshylar Qazaqstannyń syrtqy saıasatynda jaǵymdy ahýal qalyptasqanyn, eldiń strategııalyq seriktestikteri men odaqtastyq mindetterine beriktigin sóz etken.