«رەسەيلىك سپورتشى پاسپورتىمىزدى الدى»: جۋرناليست قازاق سپورتىن سىناپ, دابىل قاقتى

سپورت ءجۋرناليسى اسلان كاجەنوۆ تانىمال رەسەيلىك سپورتشىنىڭ قازاقستان ازاماتتىعىن العانىن مالىمدەدى, دەپ حابارلايدى Qandastar.kz.

جۋرناليست الەۋمەتتىك جەلىدەگى پاراقشاسىندا قىسقى وليمپيادا قارساڭىندا دايىن سپورتشىنى ەل اتىنان ونەر كورسەتۋگە شىعارۋ سالۋ — ەڭ وڭاي شەشىم ەكەنىن ايتىپ, وتكەننەن ساباق الۋعا شاقىردى.

«مىنا قىزدى نەگە اكەلدىڭدەر?!

تاعى ءبىر رەسەيلىك سپورتشى كوك پاسپورتىمىزدى الدى. ناقتىراق ايتقاندا, ەليزابەتا گولۋبەۆا بۇدان بىلاي قازاقستان ازاماتشاسى سانالادى. ءتىپتى, حالىقارالىق كونكيشىلەر وداعى وعان 2025 جىلدىڭ 5-شىلدەسىنەن باستاپ ءبىزدىڭ ەلدىڭ اتىنان ونەر كورسەتۋگە رۇقسات بەردى.

ءيا, ەليزابەتا – مىقتى سپورتشى. الەم چەمپيوناتى مەن ەۋروپا چەمپيوناتىندا جۇلدەگە ىلىككەن. بىزگە دە مەدال اكەلەر. بىراق, وسى ارقىلى كىمدى الدايمىز? ول جەڭىستەرگە شىنايى قۋانا الماساق, ول جەڭىستەر ءوز ورەندەرىمىزدىڭ جەتىستىگى بولماسا, ول جەڭىستەر وتاندىق جۇيەنىڭ جەمىسى بولماسا, قاجەتى قانشا? بۇعان دەيىن دە تالاي سپورتشى وسىلاي كەلدى. ميلليونداعان جالاقى مەن سىياقىنى الدى دا تاريحي وتاندارىنا تايىپ تۇردى. سونداي جەتىستىك كەرەك پە بىزگە? نەگە وتكەننەن ساباق المايمىز?

قىسقى وليمپياداعا جارتى جىل قالعاندا وسىلاي جانتالاسقانىمىز, قاي ساسقانىمىز? نەگە جىلتىر ءارى جەڭىل مەدالعا قۇمارمىز? ءوزىمىز نەگە چەمپيونداردى وسىرمەيمىز? ءوزىمىز نەگە ارەكەت قىلمايمىز? دايىن سپورتشىنى اكەلە سالۋ, ەڭ وڭايى عوي. ەرتەڭ وسى قىزدىڭ ناتيجەسىمەن كەرەمەت قىلىپ ەسەپ بەرەمىز. بولىنگەن ميلليارتتاردى جىلى جابامىز. ءبارى «كراساۆچيك» بولادى. بىراق, ناقتى ناتيجە ءنول. ناقتى ىسپەن ەشكىم اينالىسپايدى. وكىنىشتىسى, وتە قىسقا مەرزىمدى ويلايمىز. ياعني, ءدال قازىر جۇلدە الۋىمىز كەرەك. ال, ارى قاراي ول سپورتتىڭ تاعدىرى, جالپى وتاندىق سپورتتىق تاعدىرى ەشكىمدى الاڭداتپايدى. وسىلاي ءوز-ءوزىمىزدى 35 جىل بويى الداپ كەلدىك. تاعى الدانىپ جاتىرمىز. الدانا بەرەمىز دە…», — دەپ جازدى ول.

ءجۋرناليستىڭ جازباسىنا جەلى قولدانۋشىلارى ءتۇرلى پىكىر جازۋدا. ولاردىڭ باسىم كوپشىلىگى بۇل جاڭالىققا نارازىلىق تانىتۋدا.

«بۇندايلاردى ەل ابىرويى ءۇشىن اكەلىپ جاتقان جوق, ول راس. كوكسەگەندەرى بەلگىلى كوزدەرى قانتالاپ سول ءبىر اقشا», «ساسقان ۇيرەك ارتىمەن جۇزەدى دەگەندەي بولىپ تۇرعوي! ايتارعا ءسوزىم جوق», «كوك پاسپورتتىڭ قۇنى كەتتى مە», — دەپ جازدى ولار.