رۋسلان بەردەنوۆ سوتقا قاتىساتىن بولدى ما?

18 تامىزدا ۇكىم شىعارۋعا دەيىن تاراپتاردىڭ ءجارىسسوزى وتەدى دەپ كۇتىلىپ وتىر. پروكۋرور مەن قورعاۋشى ۇستانىمدارىن ءبىلدىرىپ, سودان كەيىن سۋديا قورىتىندى شەشىمدى دايىنداۋعا كىرىسەدى, دەپ حابارلايدى  qandastar.kz

شىمكەنتتە اكىم ورىنباسارى رۋسلان بەردەنوۆكە قاستاندىق جاساۋ ءىسى بويىنشا ءۇشىنشى سوت وتىرىسى ءوتىپ جاتىر.

سۋديا ءابىنۇر قاراباەۆ جابىرلەنۋشىنىڭ سوت پروتسەسىنە جەكە ءوزى نەمەسە ونلاين رەجيمدە قاتىسۋىن تالاپ ەتتى. ول رەسمي وكىل جەڭىس تىنىبەككە بەردەنوۆپەن بايلانىسىپ, بۇل مۇمكىندىكتى ناقتىلاۋدى تاپسىردى.

— ەگەر رۋسلان بەردەنوۆ كەلە الماسا, تەرگەۋ بارىسىندا بەرگەن جاۋابىنىڭ بەينەجازباسى پايدالانىلادى, — دەدى سۋديا.

ول ءىستى تولىق قاراۋ ءۇشىن جابىرلەنۋشىنىڭ تىكەلەي قاتىسۋىنىڭ ماڭىزدىلىعىن اتاپ ءوتتى.