«سالىق تولەۋدەن جالتارعاندار ءۇشىن»: سەناتتا قوسىمشا قۇن سالىعى بويىنشا تىركەۋ شەگىن تومەندەتۋ ۇسىنىلدى

فوتو: pixabay.com

23 ماۋسىمداعى سەناتتىڭ كەڭەيتىلگەن وتىرىسىندا جاڭا سالىق كودەكسىنىڭ جوباسى قارالدى. وندا دەپۋتاتتار قوسىلعان قۇن سالىعى (ققس) بويىنشا مىندەتتى تىركەۋ شەگىن تومەندەتۋدى ۇسىندى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

كوميتەت توراعاسى سۇلتانبەك ماكەجانوۆ سالىق-بيۋدجەت رەفورماسى اياسىندا ۇسىنىلىپ وتىرعان نەگىزگى وزگەرىستەردى قامتيتىن قورىتىندىنى وقىپ بەردى.

«ققس بويىنشا تىركەۋگە تۇرۋ ءۇشىن شەكتى اينالىم مولشەرىن 20 مىڭ ايلىق ەسەپتىك كورسەتكىشتەن (بيىل 78,6 ميلليون تەڭگە) 10 مىڭ ايلىق ەسەپتىك كورسەتكىشكە دەيىن (بيىل 39,3 ميلليون تەڭگە) تومەندەتۋ ۇسىنىلادى», – دەدى ماكەجانوۆ.

كوميتەت وكىلدەرى بۇل وزگەرىس بيزنەستى «دروبلەنيە» (جاساندى تۇردە بىرنەشە زاڭدى تۇلعاعا ءبولۋ) ارقىلى قوسىمشا قۇن سالىعىنان جالتارۋمەن كۇرەسۋگە باعىتتالعانىن اتاپ ءوتتى.

جاڭا سالىق كودەكسىن تالقىلاۋ بارىسىندا ۇكىمەت بۇل شەكتى 15 ميلليون تەڭگەگە دەيىن تومەندەتۋدى ۇسىنعان ەدى. بۇل ۇسىنىس بيزنەس قاۋىمداستىعى مەن ساراپشىلار اراسىندا قىزۋ پىكىرتالاس تۋدىردى. قارسى تاراپ بۇل قادام شاعىن بيزنەستىڭ جۇمىسىنا كەدەرگى كەلتىرىپ, كوپتەگەن كاسىپكەردى جالپى سالىق رەجيمىنە وتۋگە ماجبۇرلەيتىنىن جانە قوسىمشا اكىمشىلىك ءارى قارجىلىق شىعىندارعا الىپ كەلەتىنىن ايتتى.

وسىلايشا دەپۋتاتتار ىمىرالى شەشىم قابىلداپ, جاڭا شەكتى 10 مىڭ ايلىق ەسەپتىك كورسەتكىش دەڭگەيىندە بەلگىلەۋدى ۇسىندى. بۇل وزگەرىس بيزنەستى بولشەكتەۋ ماسەلەسىن شەشۋگە كومەكتەسىپ قانا قويماي, شاعىن جانە ميكروبيزنەستىڭ مۇددەسىن دە ەسكەرۋگە مۇمكىندىك بەرەدى دەيدى.

ۇسىنىلعان سالىق كودەكسىنە ەنگىزىلەتىن وزگەرىستەر بۇگىن سەناتتا ءبىرىنشى وقىلىمدا قارالىپ جاتىر. ەگەر زاڭ جوباسى ماقۇلدانسا, ول ءارى قاراي جەتىلدىرىلەدى.

ەسكە سالايىق, بۇعان دەيىن سالىق كودەكسىنە بايلانىستى ميلليونداعان قازاقستاندىقتىڭ جالاقىسى قايتا ەسەپتەلەتىنى تۋرالى جازعان ەدىك. مەملەكەتتىك كىرىستەر كوميتەتىنىڭ جاڭا شەگەرىمىنە بايلانىستى بۋحگالتەرلەر ميلليونداعان قازاقستاندىقتىڭ جالاقىسىن قايتا ەسەپتەۋگە ءماجبۇر بولادى. قازىر قازاقستاندا ءبىلىم بەرۋ, مەديتسينا, يپوتەكالىق تۇرعىن ءۇي نەسيەلەرى بويىنشا سىياقى جانە كوپبالالى وتباسىلارعا 14 اەك كولەمىندە شەگەرىم بار. ەندى سەناتتا قارالىپ جاتقان سالىق كودەكسى ولاردىڭ كۇشىن جويۋدى جوسپارلاپ وتىر, بىراق ستاندارتتى بازالىق شەگەرىمدى قازىرگى 14 اەك-تەن ايىنا 30 اەك-كە (جىلىنا 360 اەك) دەيىن ۇلعايتادى. ەگەر كودەكس قابىلدانسا, بۇل شەگەرىم 2025 جىلدىڭ 1 قاڭتارىنان باستاپ ياعني ارتقى كۇنمەن بەكىتىلىپ قولدانىلادى.