«ساپالى» قازاقتاردى اكەلۋ كەرەك: بەلگىلى تاريحشى قانداستار ماسەلەسىن كوتەردى

فوتو: اشىق دەرەككوز

قىتاي وسى قانداي كورشى? بالقاشقا دەيىنگى جەر قىتايدىكى دەپ وقىتاتىنى راس پا? جانە قىتايدان تەك “ساپالى” قازاق كەلۋ كەرەك دەگەندى قاي قازاق شىعاردى? تاريحشى, اۋدارماشى تۇرسىنحان زەكەن ۇلى Qasqa Jol YouTube-ارناسىنا بەرگەن سۇحباتىندا موناحتارعا اينالعان شىڭعىسحان ۇرپاقتارى, موڭعول يمپەرياسىنىڭ تۇبىنە جەتكەن بۋددا ءدىنى, قىتايداعى “قازاق ءشوۆينيزمى”, بارىسقا اينالىپ كەتكەن كوك ءبورى سياقتى ءار قازاقتىڭ جانىنا باتاتىن تاقىرىپتار جونىندە ەگجەي-تەگجەيلى ايتتى, دەپ حابارلايدى qandastar.kz

«سىرتتان كەلگەن ءاربىر قازاققا قۋانا ءبىلۋىمىز كەرەك. بولاشاقتا ولاردىڭ ۇرپاعى ءبىزدىڭ ەلىمىزدىڭ تىرەگى بولادى. الايدا سىرتتان كەلەتىن قازاقتاردىڭ كوشى سايابىرلاپ قالدى. وعان ءارتۇرلى سەبەپتەر بار, ءبىرى كارانتين بولسا, ءبىرى زاڭ جۇيەسىندەگى ءارتۇرلى وزگەرىستەر. ءبىزدىڭ بۇرىنعى بۋىن, ياعني تاۋەلسىزدىك العان جىلدارى قانداستارىمىزدىڭ ەلگە ورالۋىنا كوپ كوڭىل ءبولدى. الايدا قازىرگى بيلىكتەگى جاس بۋىنعا ءبارىبىر. سەبەبى قازىرگى جاستاردىڭ سىرتتاعى قازاقتارعا جانى اشي قويمايدى. ءاربىر قازاق وتانى ءۇشىن جانىن بەرۋى كەرەك. شىنىن ايتقاندا, سىرتتاعى قازاقتار بالالارىنىڭ بولاشاعى ءۇشىن قازاقستانعا كەلگىسى كەلەدى», – دەدى ت.زەكەن ۇلى.

Skifnews.kz جازعانداي,  تاريحشى ۇلتتىق تاريحنامامىزدىڭ كەمشىن تۇستارىن ءسوز ەتىپ, زاڭدى كۇشەيتۋ كەرەكتىگىن ايتتى.

«بۇعان تاريحشىلارىمىزدىڭ السىزدىگى سەبەپ بولىپ تۇر. قازىر تاريح سالاسىندا ۇلكەن كۇرەس ءجۇرىپ جاتىر. مۇنىڭ ءبىر سەبەبى – رۋعا ءبولىنۋ. ماسەلەن ۇلى تۇلعالارىمىزدى ءاربىر رۋ وزىنە تارتىپ, جىككە ءبولىنىپ ءجۇر. ءبىز مۇنىمەن امەريكا اشا المايمىز. بۇل تۇستا ءاربىر سوزىمىزگە ساق بولۋىمىز كەرەك. رۋحىمىز مىقتى بولماسا كورىنگەنگە جەم بولۋىمىز ابدەن مۇمكىن», – دەپ قورىتىندىلادى ول.