سارا نازارباەۆا قۇرعان «بوبەكتىڭ» اينالاسىندا نە بولىپ جاتىر?

فوتو Orda.kz

كۇنى كەشە سارا نازارباەۆا اشقان «بوبەك» ورتالىعى قايتا قۇرىلادى دەگەن سىبىس تارادى, – دەپ جازادى Qandastar.kz.

ينسايدتاردا تاراعانداي, ورتالىق ەندى رەسپۋبليكالىق مەملەكەتتىك كاسىپورىن رەتىندە قۇرىلۋى مۇمكىن. كەزىندە الماتىدا بۇل ورتالىقتىڭ ەكى الاڭى بولعان كورىنەدى. الايدا ءبىر جەر تەلىمىن بىرنەشە جىل بۇرىن «الىپ قويعان». بۇعان دەيىن بۇل جەردە «ءوزىن-ءوزى تانۋ» ادامنىڭ ۇيلەسىمدى دامۋى گۋمانيتارلىق كوللەدجى جانە «بوبەك» وقۋ-ساۋىقتىرۋ كەشەنى جۇمىس ىستەگەن. «بوبەكتە» جىل سايىن وزگە وڭىرلەردىڭ وقۋشىلارى ءۇشىن جازعى دەمالىس لاگەرى ۇيىمداستىرىلىپ كەلگەن.

الايدا 2021 جىلى بۇل اۋماق كۇردەلى جوندەلەدى دەگەن رەسمي مالىمدەمەدەن سوڭ تولىق جابىلدى. ال كوللەدج باسقا مەكەن-جايعا اۋىسقان.

وسىدان كەيىن بۇل جەر «بوبەككە» قايتارىلمايدى, ول اباي اتىنداعى رەسپۋبليكالىق مامانداندىرىلعان مەكتەپ-ينتەرناتىنا بەرىلەدى دەگەن اقپارات تارادى. سونداي-اق, ەكىنشى جەر تەلىمىنە تۇرعىن ءۇي كەشەنى, بيزنەس ورتالىعى, ساۋدا ورتالىعى نەمەسە كوتتەدج قالاشىعى سالىنادى دەگەن قاۋەسەت شىقتى. سوندىقتان قازىر «بوبەك» گيمنازياسىنىڭ اتا-انالارى الاڭداۋشىلىق تانىتىپ, ينكليۋزيۆتى مەكەمەنىڭ قايتا قۇرىلۋىن تالاپ ەتىپ وتىر.

ودان بەرى ءۇش جىل وتكەنى ماسەلەنى كۇردەلەندىردى. بۇل تۋرالى ءبىلىم مينيسترلىگىنىڭ بەرگەن رەسمي جاۋابى مىناداي: «نىسان جاڭا ءبىلىم كەڭىستىگىنە اينالادى».

ال الماتى اكىمشىلىگى ۇسىنعان اقپاراتتا باس جوسپار بويىنشا بۇل جەردە ۇلتتىق شىعارماشىلىق مەكتەپ سالىنۋى تيىستىگى ايتىلادى. بۇگىندە قۇرىلىس قالدىقتارىن تازالاۋ جۇمىستارى جۇرگىزىلۋدە.

ەسكە سالايىق, ورتالىق 1997 جىلى سارا نازارباەۆانىڭ باستاماسىمەن «رەسپۋبليكالىق بالالار ساۋىقتىرۋ-وڭالتۋ ورتالىعى» بولىپ قۇرىلعان. ال ادامنىڭ ۇيلەسىمدى دامۋىنىڭ «ءوزىن-ءوزى تانۋ» گۋمانيتارلىق كوللەدجى 2009 جىلى نەگىزى قالانعان. وسى جىلى «ءوزىن-ءوزى تانۋ» ءپانى مىندەتتى مەكتەپ باعدارلاماسىنا ەندى.

بۇل ءپان بويىنشا ماماندار «بوبەك» ورتالىعىنداعى «ءوزىن-ءوزى تانۋ» كوللەدجىندە وقىتىلىپ, وقۋلىقتار مەن وقۋ-ادىستەمەلىك قۇرالدارىن ادامنىڭ ۇيلەسىمدى دامۋى ۇلتتىق ينستيتۋتىنىڭ ماماندارى ازىرلەپ وتىردى. بۇل ءۇشىن بيۋدجەتتەن جىل سايىن جۇزدەگەن ميلليون قارجى بولىنگەن.

2021 جىلى كوللەدج الاڭىن جوندەۋ جۇمىستارىنا جاپتى. كوللەدج باسقا مەكەن-جايعا كوشىرىلدى. ال 2022 جىلدىڭ قىركۇيەگىنەن باستاپ «ءوزىن-ءوزى تانۋ» ءپانىن مىندەتتى مەكتەپ باعدارلاماسىنان الىنىپ تاستالدى.

تاعى ءبىر ەسكەرەر تۇس, ەكىنشى عيمارات سۇرىلمەگەن. وندا قازىر «وركەن» بالالاردى قورعاۋ ۇلتتىق عىلىمي-پراكتيكالىق ينستيتۋتى جۇمىس جۇرگىزۋدە.

ايتا كەتۋ كەرەك, وقۋ-اعارتۋ مينيسترلىگىنىڭ «بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعى» رەسپۋبليكالىق مەملەكەتتىك قازىنالىق كاسىپورنىن قايتا ۇيىمداستىرۋ تۋرالى» ۇكىمەت قاۋلىسىنىڭ جوباسى جاريالانعان. قاۋلى بويىنشا اتالعاە ورتالىق ەندى ۇزدىكسىز ينكليۋزيۆتى ءبىلىم بەرۋدىڭ ۇلتتىق عىلىمي-پراكتيكالىق ورتالىعى رەتىندە اتالادى.