«ساۋساعى سىنىپ, ميى شايقالعان»: قاراعاندى تۇرعىنى مەدبيكەنى 20 مينۋت بويى ۇرىپ-سوققان

فوتو: سكرينشوت

16 شىلدە كۇنى قاراعاندىداعى جەكەمەنشىك مەديتسينالىق ورتالىقتاردىڭ بىرىندە ەر ادام مەدبيكەگە شابۋىل جاساپ, سوققىعا جىققان, دەپ حابارلادى qandastar.kz

وقيعانىڭ ءمان-جايىن زارداپ شەككەن قىزدىڭ اناسى ايتىپ بەردى.

ونىڭ ايتۋىنشا, كەشكى ساعات ءتورتتىڭ شاماسىندا ۇيىنە قايتۋعا جينالىپ, ءبىر زات الۋ ءۇشىن كابينەتكە كىرگەن. سول كەزدە ورتالىقتا ەر ادام بولعان. ول ايەلى مەن بالالارىمەن بىرگە كەلگەن. ارتىنشا ەر ادام قىز كىرگەن كابينەتكە كىرمەك بولادى. بىراق بۇل بولمە قىزمەتتىك بولعاندىقتان, ونى كىرگىزبەگەن.

اگرەسسيانىڭ باستالعان ءساتى بەينەباقىلاۋعا ءتۇسىپ قالدى.

تىيىم مەن ەسكەرتۋلەرگە قاراماستان, ول ەسىكتى سىندىرىپ كىرگەن. بەينەجازبادا تەك زارداپ شەككەن قىز عانا ەمەس, وزگە دە مەديتسينا قىزمەتكەرلەرى ەر ادامنىڭ ىشكە كىرۋىنە كەدەرگى كەلتىرگەنى بايقالادى.

«ول قىزىمدى 20 مينۋت بويى ۇرىپ-سوقتى. ەكى ساۋساعى سىنعان, ميى شايقالعان. قولىن تىستەگەن. قاتىگەزدىكپەن ۇردى. قىزىم جىلادى, ايقايلادى, جالىنىپ: «مەن جالعىزباستى انامىن, بالامدى ءوزىم تاربيەلەپ وتىرمىن» دەدى. بىراق ول توقتامادى. قىزىمنىڭ ۇزىن شاشىن قولىنا وراپ تارتىپ, جۇلدى. شاشىنىڭ ورتاسى ج ۇلىنىپ قالعان, باسى قانعا بويالعان. قازىر ول اۋرۋحانادا جاتىر», — دەيدى اناسى ساۋلە تاسماعامبەتوۆا كوز جاسىن ارەڭ تىيىپ.

بىراق قىزى اۋرۋحاناعا جاتقىزىلعان سوڭ دا ەر ادامنىڭ وتباسى تىنىشتىق بەرمەگەن.

«تۋىستارى كەلىپ, كەشىرىم سۇراپ, ارىزدى قايتارىڭدار دەپ ءوتىندى. قانداي كەشىرىم? ارىزدى قالاي الامىز? ەندى ولار ونىڭ جاقسى كۇيەۋ, جاقسى اكە ەكەنىن ايتىپ اقتالىپ جاتىر. ءۇش بالاسى بار ەكەن. ال ۇرىپ جاتقاندا سول ءۇش بالا قاراپ تۇرعان. ونداي ادامدى اكەلىك قۇقىعىنان ايىرۋ كەرەك», — دەيدى اناسى.

جابىرلەنۋشى جاق شابۋىلداۋشىنىڭ جازادان قۇتىلىپ كەتۋىنەن قورقادى.

«ولار ونىڭ استانادان العان انىقتاماسى جانە ەپيلەپسيامەن اۋىراتىنىن, پسيحيكالىق اۋىتقۋى بارىن ايتتى. قولدارىندا ءبىر جاپىراق قاعازدى بۇلعاپ ءجۇر. بىراق كۇندىز جەدەل جاردەممەن الىپ كەتكەندە دارىگەر «دەنى ساۋ» دەپ دياگنوز قويعان. كەشكە عانا «ەسى دۇرىس ەمەس» دەپ پسيحياتريالىق اۋرۋحاناعا جاتقىزىپ جىبەرگەن. بۇل نە ماسقارا? ول جاۋاپكەرشىلىكتەن قاشىپ قۇتىلىپ كەتە مە? ال ەندى مەنىڭ قىزىم پسيحولوگتىڭ كومەگىن قاجەت ەتەدى. ول قالاي ءومىر سۇرەدى ەندى?, — دەپ اشىنادى اناسى.

وقيعاعا قاتىستى وڭىرلىك پوليتسيا دەپارتامەنتى تۇسىنىكتەمە بەردى.

اتالعان فاكت راستالدى. كۇدىكتى راسىمەن دە پسيحونەۆرولوگيالىق ورتالىققا جاتقىزىلعان, قازىر دارىگەرلەردىڭ باقىلاۋىندا. جەكەمەنشىك مەديتسينالىق مەكەمە قىزمەتكەرىنە كۇش قولدانۋ فاكتىسى بويىنشا قىلمىستىق ءىس قوزعالدى. پوليتسيا شابۋىل جاساعان ەر ادامنىڭ 42 جاستا ەكەنىن انىقتاعان. قىلمىستىڭ سەبەبى ازىرگە بەلگىسىز, تەرگەۋ انىقتايتىن بولادى. قاراعاندى وبلىستىق پوليتسيا دەپارتامەنتىنىڭ باسشىلىعى ءىستى ەرەكشە باقىلاۋعا الدى, — دەدى پوليتسيا.

turkystan.kz سايتى ekaraganda.kz باسىلىمىنا سىلتەمە جاساعان  دەنساۋلىق ساقتاۋ باسقارماسىنىڭ حابارلاۋىنشا, جابىرلەنۋشى قازىر شۇعىل نەيروحيرۋرگيا بولىمىندە جاتىر. جاعدايى — ورتاشا اۋىر, بىراق تۇراقتى.