ساياساتتانۋشى: تالعارداعى وقيعا ب ۇلىككە اكەلۋى مۇمكىن

فوتو: جەكە قورىنان

تالعاردا ورىن العان شەرزات بولاتتىڭ قازاسىنا قاتىستى قوعام نارازىلىعى تىيىلماي تۇر. اسىرەسە قالا ماڭىنان مارقۇمنىڭ اعاسى نۇرقانات عايىپباەۆتىڭ ءمايىتى تابىلعاننان بەرى ازالى شاڭىراققا قاساقانا قىسىم جاسالىپ جاتىر دەگەن بولجام ايتىلۋدا, دەپ جازدى qandastar.kz

ءتىپتى كەي ساراپشىلار وقيعانىڭ بۇلاي ۇدەۋىن «ب ۇلىكشىلەر» ءوز پايداسىنا جاراتا ما دەپ قورقىپ وتىر. مىسالى, تاياۋدا پوليتولوگ ارسەن سارسەكوۆ وقيعاعا قاتىستى پىكىر ءبىلدىرىپ, اقپارات كەڭىستىگىندە سىرتقى كۇشتەردىڭ تەرىس ارەكەتى بايقالاتىنىن  مالىمدەدى.

«ساياساتتانۋشى رەتىندە شىن مانىسىندە كۇندەلىكتى سيپاتقا يە بۇل تراگەديانى ساياسيلاندىرىپ قانا قويماي, بۇكىل ەلدە بەيبەرەكەت نارازىلىق تۋدىرۋدىڭ ايقىن تالپىنىستارىن اتاپ وتپەسەم دە بولمايدى.

بىرىنشىدەن, ءارتۇرلى الەۋمەتتىك پلاتفورمالاردا تەحنولوگتار جاساعان مازمۇن بار (شامامەن شەتەلدەن). ولاردىڭ ماقساتى – ەلدەگى نارازىلىق الەۋەتىن ارتتىرۋ. ولار ءۇشىن تالعارداعى قايعىلى وقيعا كونستيتۋتسيالىق قۇرىلىستى كۇشپەن وزگەرتۋ تۋرالى اڭگىمەلەردى ناسيحاتتاۋدىڭ ءبىر قۇرالى عانا» , – دەدى ساياساتتانۋشى.

سونىمەن قاتار پوليتولوگ الەۋمەتتىك جەلىدەگى تالعار تراگەدياسىنا قاتىستى اقپاراتتاردى زەرتتەگەنىن ايتقان. ونىڭ سوزىنشە, وقيعاعا قاتىستى تارالىپ جاتقان كونتەنتتەر اراسىندا ارانداتۋشىلىق باعىتتاعى جۇيەلى كوماندا جۇمىسى بايقالاتىنىن ايتقان.

«بايقاساڭىز, اككاۋنتتار تەك وسى وقيعا ءۇشىن جاسالعان, ويتكەنى ولاردا تەك تالعارداعى وقيعالارعا قاتىستى مازمۇن بار.  ماتەريالداردى قاراپ وتقان ادامنىڭ ەموتسياسىنا اسەر ەتەتىن مۋزىكالىق سۇيەمەلدەۋ دە قالىس قالماعان. مىسالى, شەرزاتتىڭ ءومىرىن باياندايتىن روليكتە مايكل دجەكسوننىڭ پروتەست باعىتىنداعى They Don’t Care About Us وينايدى. قاڭتاردا تۇسىرىلگەن كادرلاردى ءدال قازىر «بولىپ جاتىر» دەپ, ەلگە قوزعاۋ سالعىسى كەلەتىندەردىڭ بارى دا بايقالادى», – دەدى سارسەكوۆ.

سونىمەن, ساياساتتانۋشى شەرزات بولاتتىڭ قازاسىن ساياسي مۇددەگە پايدالانۋشىلار بارىن جاسىرمادى. قاۋىپتىسى, كوبىنە مۇنداي ساياسي قادام ەلدە «ب ۇلىك» تۋدىرۋ ءۇشىن جاسالادى ەكەن. سوندىقتان ءادىل سوت وتكىزىپ, كىنالىلەرگە لايىقتى جازا بەرۋ قوعام كوڭىل-كۇيىن باقىلاۋدا ۇستاۋدىڭ جالعىز جولى ەكەنىن جەتكىزدى.

«قاراپايىم ازامات رەتىندە ەكى ادامنىڭ قازاسىنا قايعىرىپ كوڭىل ايتامىن, سونداي-اق بارلىق كىنالىلەر جاساعان ارەكەتى ءۇشىن قاتاڭ جازالانىپ, ەشكىم ءادىل سوتتان قۇتىلا المايدى دەپ سەنەمىن», – دەدى ول.