Senat Túrkistan qalasyna erekshe mártebe berý týraly zańdy maquldady

Foto: ashyq derekkóz

Senattyń kezekti jalpy otyrysynda senatorlar  «Túrkistan qalasynyń erekshe mártebesi týraly» Qazaqstan Respýblıkasynyń Zańyn birinshi oqylymda maquldady. Bul zań Túrkistan qalasynyń tarıhı jáne mádenı murasyn saqtaý men damytýǵa baǵyttalǵan, — dep habarlaıdy qandastar.kz

Zańǵa sáıkes, Túrkistan qalasyndaǵy tarıhı-mádenı eskertkishterdi, sonyń ishinde Qoja Ahmet Iasaýı kesenesiniń qorǵaý aımaqtarynda ornalasqan nysandardy basqarý, saqtaý jáne olardyń tutastyǵyn qamtamasyz etýdiń tıimdi júıesin qurý kózdelgen.

Sonymen qatar zańda mynadaı baǵyttar qarastyrylǵan:

• Qoja Ahmet Iasaýı kesenesi men onyń qorǵaý aımaqtaryndaǵy tarıhı jáne mádenı eskertkishterde arheologııalyq jáne ǵylymı-restavraııalyq jumystardy josparlaý jáne júrgizý;
• Tarıhı-mádenı murany saqtaý, damytý, qaıta jańǵyrtý jáne ulttyq qolónerdi órkendetý;
• Túrkistan qalasyndaǵy tarıhı-mádenı mura nysandaryn qorǵaý jáne paıdalaný jónindegi sheshimderdi ǵylymı turǵydan negizdeý;
• Túrkistan qalasynyń halyqaralyq yntymaqtastyǵyn damytý.

Zańda tarıhı jáne mádenı eskertkishterdi qorǵaý jónindegi normalar naqty kórsetilgen. Túrkistan qalasynyń arheologııalyq jáne ınfraqurylymdyq eskertkishterine qatysty erejeler de belgilengen.

Senator Súıindik Aldashevtiń aıtýynsha, qurylys salýdy retteý aımaǵynda júrgiziletin qurylys jumystary tarıh jáne mádenıet eskertkishteriniń sáýlettik kelbetin buzbaýy tıis. Qoja Ahmet Iasaýı kesenesiniń biregeıligin saqtaý maqsatynda, onyń qorǵaý aımaǵynyń shekarasynan 100 metr qashyqtyqta bıiktigi 7 metrden asatyn, sondaı-aq kólemi, túsi men qurylys materıaldary tarıhı-mádenı eskertkishtermen úılespeıtin nysandardyń salynýyna jol berilmeıdi.