«Serpin» baǵdarlamasyna ózgerister engiziledi

Foto: Uza.uz

Bıyl «Serpin» baǵdarlamasyna memleketten 3 903 grant bólinip otyr, dep habarlady Qazaqparat.

«Serpin» baǵdarlamasymen oqýǵa túsken túlekter, grant berilgen óńirde jumys isteýi tıis edi. Biz bul talapty ózgertip, ıaǵnı jeńildetpekpiz. Endi túlekter «Serpin» baǵdarlamasy iske qosylǵan kez kelgen óńirde jumys isteı alady. Nege? Sebebi eńbek naryǵy ózgerýde. Bizde eńbek naryǵy qajettilikterin anyqtaıtyn mehanızmder naqty emes, problemalar bar», – dedi Úkimet otyrysynan keıin BAQ ókilderiniń saýalyna jaýap bergen Ǵylym jáne joǵary bilim mınıstri Saıasat Nurbek.

Mınıstr sondaı-aq kadr daıarlaýda sapaǵa mán beretin ýaqyt kelgenin aıtty.

«Sapa artqanda naryqta kadrlardyń quny eselene túsedi. Qazir bizdiń barlyq nazarymyz sapaǵa aýdarylýda», – deıdi ol.

Sonymen qatar vedomstvo basshysy eger túlek «Serpin» baǵdarlamasynyń mindettemelerin oryndamasa, onda aqshany keri qaıtarýǵa mindetti ekenin eske saldy.

Aıta keteıik, bıyldan bastap «Serpin» arqyly tek qana 5 oblystaǵy aýyl balalary grantqa túse alady.

«Serpin» jobasynyń basty maqsaty – elimizdiń ońtústik óńirleriniń jastaryn kadr tapshylyǵyn kórip otyrǵan aımaqtarda oqytyp, bilikti mamandar daıarlaý.