شاحتەرلار شاتتىعى: كاسىبي مەرەكەدە تاجىريبەلى ماماندارعا قۇرمەت كورسەتىلدى

فوتو: جەكە قورىنان

Qarmet كومپانياسىنىڭ 18 شاحتەرىنە «قۇرمەت», ءىىى دارەجەلى «ەڭبەك داڭقى» , «ەرەن ەڭبەگى ءۇشىن» مەملەكەتتىك ماراپاتتارى تابىستالدى. ماراپاتتى قاراعاندى وبلىسىنىڭ اكىمى ەرماعانبەت بولەكپاەۆ تاپسىردى, – دەپ حابارلايدى qandastar.kz.

«شاحتەر — بۇل مارتەبە جانە مىنەز. شاحتەرلەر تەك ەڭبەكقورلىعىمەن, تاباندىلىعىمەن جانە باتىلدىعىمەن عانا ەمەس, سونداي-اق ادالدىعىمەن جانە جاقىنىنا كومەك كورسەتۋگە دايىندىقپەن دە ەرەكشەلەنەدى. وسى قۇرمەتتى ماماندىقتىڭ وكىلدەرىن شىن جۇرەكتەن قۇتتىقتايمىن. شاحتەرلەر ايتپاقشى – تاس توبەنىڭ بەكەمدىگىن تىلەيمىن. شاحتەر كۇنى قۇتتى بولسىن!», – دەدى بولەكپاەۆ.

«قۇرمەت» وردەنىنىڭ يەگەرلەرىنىڭ ءبىرى نۇرجان ۋاليەۆ «تەلەديداردان پرەزيدەنتىمىزدىڭ شاحتەرلەردى ماراپاتتاۋ تۋرالى جارلىققا قول قويعانىن ەستىپ, جۇمىسقا كەلسەم, ماعان «قۇرمەت» وردەنى بەرىلگەنىن ايتتى. ءوزىم اباي شاحتاسىندا 5-رازريادتى پروحودچيك بولىپ جۇمىس ىستەيمىن, ەڭبەك ءوتىلىم – 33 جىل. مەن وتە قۋانىشتىمىن, بۇل ۇلكەن ەستەلىك, نەمەرەلەرىم كورەتىن بولادى. بارلىقتارىڭىزدى مەرەكەمەن قۇتتىقتايمىن!» دەگەن پىكىر ءبىلدىردى ول.

مەملەكەتتىك ناگرادالاردان باسقا, «شاحتەر داڭقى» ءۇش دارەجەسى, «ەڭبەك داڭقى» II دارەجەسى بەلگىلەرى جانە «ەڭبەك ارداگەرى» مەدالدارى دا تاپسىرىلدى. ماراپاتتالعاندار اراسىندا تازالاۋ جۇمىستارىنىڭ تاۋ-كەنشىلەرى, تاۋ-كەن ماشينالارىنىڭ ماشينيستەرى, جەر استىنداعى ەلەكتر سلەسارلارى جانە ەنەرگەتيكتەر بولدى. ماراپاتتاردى قر يندۋستريا جانە قۇرىلىس ءمينيسترىنىڭ ورىنباسارى ولجاس ساپاربەكوۆ تاپسىردى.

«ومىرلەرىڭىزدى اۋىر, بىراق قۇرمەتتى ىسكە ارنادىڭىزدار. تاباندىلىقتارىڭىزبەن جانە جانقيارلىق ەڭبەكتەرىڭىزبەن ۇلتتىق ەكونوميكانىڭ وسۋىنە جانە مەملەكەتىمىزدىڭ تاۋەلسىزدىگىنىڭ نىعايۋىنا ۇلەس قوسۋداسىزدار», – دەپ اتاپ ءوتتى ساپاربەكوۆ.

شاحتەرلەردى Qarmet كومپانياسىنىڭ باسشىلىعى دا قۇتتىقتادى. ءوندىرىستىڭ ون ءبىر ۇزدىك قىزمەتكەرىنە «Chevrolet Onix» جەڭىل اۆتوكولىكتەرىنىڭ كىلتتەرى تابىس ەتىلدى. سىيلىقتاردى Qarmet كومپانياسىنىڭ ديرەكتورلار كەڭەسىنىڭ توراعاسى اندرەي لاۆرەنتەۆ, باس ديرەكتور ۆاديم باسين جانە كومىر دەپارتامەنتىنىڭ ديرەكتورى جاحان مۇحامەدجانوۆ تاپسىردى. اۆتوكولىك يەلەرى: ۆلاديمير جۋكوۆ (كوستەنكو شاحتاسىنىڭ جەر استى ەلەكتر سلەسارى), ۆيكتور دۋلشا (كۇزەمباەۆ اتىنداعى شاحتانىڭ تاۋ-كەن جۇمىسشى جوندەۋشىسى), ۆلاديمير بۋلاتكين (كۇزەمباەۆ اتىنداعى شاحتانىڭ تاۋ-كەن ماشينالارىنىڭ ءماشينيستى), يۆان شەۆتسوۆ (سارانسكايا شاحتاسىنىڭ ۋپر-1 پروحودچيگى), كونستانتين پروتسەنكو (اباي شاحتاسىنىڭ تاۋ-كەن ماشينالارىنىڭ ءماشينيستى), يلدۋس قۇرمانوۆ (قازاقستان شاحتاسىنىڭ تاۋ-كەن ماشينالارىنىڭ ءماشينيستى), سەرگەي مالەنوك (لەنين اتىنداعى شاحتانىڭ ۋپر-1 پروحودچيگى), ابدۋل شابانوۆ (شاحتينسكايا شاحتاسىنىڭ ۋپر-1 پروحودچيگى), امانگەلدى جۇماكوۆ (تەنتەكسكايا شاحتاسىنىڭ ۋپر-3 پروحودچيگى), رۋسلان كيشمان (شىعىس تسوف-تىڭ جوندەۋ جانە قىزمەت كورسەتۋ سلەسارى) جانە الەكساندر كايدالوۆ (ۋسشمد بۇرعىلاۋ قوندىرعىسىنىڭ ءماشينيستى).

«شاحتالاردا بۇرعىلاۋشى بولىپ جۇمىس ىستەيمىن. مەنىڭ ەڭبەك ءوتىلىم 26 جىل, مۇنداي جاعداي ومىرىمدە العاش رەت بولدى. كولىكتى ءوزىم جۇرگىزەمىن, بىراق الدىمەن جۇرگىزۋشى كۋالىگىن الۋ كەرەك», – دەدى الەكساندر كايدالوۆ تولقىپ.

Qarmet كومپانياسىنىڭ ديرەكتورلار كەڭەسىنىڭ توراعاسى اندرەي لاۆرەنتەۆ قۇتتىقتاۋ ءسوز سويلەدى.

«بۇل كۇنى مەن سىزدەرگە زور دەنساۋلىق جانە جاڭا جەڭىستەر تىلەيمىن. ارقايسىڭىز ءۇشىن ەڭ ماڭىزدىسى, ءبىزدىڭ وتانىمىز دامىپ, قاراعاندى قالامىز شاحتەرلەر استاناسى دەگەن ۇلكەن جانە كۇشتى اتاقتى ماقتانىشپەن الىپ ءجۇرۋى. وسىلاي جالعاسا بەرەدى. وسى ۇلى ەرلىك, كۇش جانە باتىلدىق مەرەكەسىمەن قۇتتىقتايمىن. بارلىعىڭىزعا جاقسىلىق تىلەيمىن», – دەدى لاۆرەنتەۆ.

Qarmet باس ديرەكتورى ۆاديم باسين دە ارىپتەستەرىن الداعى مەرەكەمەن قۇتتىقتاپ, جاڭا جەتىستىكتەر مەن قاۋىپسىز جۇمىس تىلەدى.

«قۇرمەتتى جەرلەستەر, ارىپتەستەر, قادىرلى شاحتەرلەر مەن كومىر سالاسىنىڭ ارداگەرلەرى! جەر استىنداعى ەڭ باستىسى – شاحتەر. ءوز ىسىنە ادال, ەرجۇرەك جانە جانقيارلىقپەن ەڭبەك ەتەتىن ادامدار, جىلدار بويى ءبىر-بىرىنە يىق تىرەسە جۇمىس ىستەپ, قۋانىش پەن جەڭىستى بولىسەدى. بارشاڭىزدى مەرەكەمەن قۇتتىقتايمىن! دەنساۋلىق, باقىت, اماندىق, قاۋىپسىز جۇمىس جانە جاڭا جەڭىستەر تىلەيمىن!», – دەپ قۇتتىقتادى ول.

قۇتتىقتاۋعا كومىر دەپارتامەنتىنىڭ ديرەكتورى جاقان مۇحامەدجانوۆ تا قوسىلىپ, تاۋ-كەنشىلەردىڭ ەرلىك ەڭبەكتەرىن اتاپ ءوتتى.

«ءداستۇر بويىنشا تامىز ايىنىڭ سوڭعى جەكسەنبىسىندە ءبىز ءوز كاسىبي مەرەكەمىز – شاحتەر كۇنىن اتاپ وتەمىز. ءبىزدىڭ تاريحىمىز جالعاسىپ جاتىر, ءوز ءىسىمىزدى دۇرىس تۇسىنسەك, ءبارى ءساتتى بولادى. بارشاڭىزعا مىقتى دەنساۋلىق, جاقىندارىڭىزعا اماندىق تىلەيمىن. وزدەرىڭىزدى كۇتىڭىزدەر, مەرەكەلەرىڭىزبەن!», – دەدى جاقان مۇحامەدجانوۆ.

ماراپاتتاۋ ءراسىمىنىڭ سوڭعى بولىگىندە قازاقستاندىق جانە شەتەلدىك ەسترادا جۇلدىزدارىنىڭ قاتىسۋىمەن كەرەمەت كونتسەرت ءوتتى. شاحتەرلەر ءۇشىن حورەوگرافيالىق انسامبلدەر, انشىلەر مارات بەكىشەۆ, تالعات يدريسوۆ, نۇرلان ابدۋللين جانە يگور نيكولاەۆ ونەر كورسەتتى.