شانحاي – الماتى اۋە رەيسى اشىلادى

قىتايدىڭ China Eastern Airlines اۋە كومپانياسى شانحاي – الماتى باعىتى بويىنشا جاڭا تىكەلەي اۋە رەيسىن ىسكە قوسادى, دەپ حابارلايدى Qandastar.kz اقپارات پورتالى. 

شانحايدان الماتىعا China Eastern Airlines-ءتىڭ العاشقى ۇشاعى 4 شىلدەدە كەلىپ قونادى دەپ كۇتىلۋدە.

بۇل وقيعا ەكى مەگاپوليس اراسىنداعى تۋريستىك, مادەني جانە ىسكەرلىك بايلانىستاردى نىعايتۋ جولىنداعى ماڭىزدى قادام بولماق.

«العاشقى رەيسپەن اۋە كومپانياسىنىڭ وكىلدەرى, قىتايلىق باق پەن بلوگەرلەر كەلىپ جەتەدى دەپ جوسپارلانۋدا. بۇل قىتايدا اۋە رەيسىنىڭ اشىلۋىن كەڭىنەن جاريالاۋعا مۇمكىندىك بەرەدى. وسىعان وراي قالالىق تۋريزم باسقارماسى “الماتىنىڭ سيمۆولى – سىيلىق رەتىندە” اتتى اكتسيا ۇيىمداستىرادى – رەيس جولاۋشىلارىنا ەستەلىك سىيلىقتار تابىستالادى», – دەلىنگەن حابارلامادا.

اكىمدىكتىڭ مالىمەتىنشە, بۇل – اتالعان اۋە كومپانيانىڭ ورتالىق ازياعا العاشقى باعىتى.

جاڭا مارشرۋت 2025 جىلدىڭ اقپانىندا الماتى قالاسى اكىمدىگى مەن China Eastern Airlines باسشىلىعى اراسىندا قول جەتكىزىلگەن كەلىسىمدەردىڭ ناتيجەسى بولدى.

بۇگىندە الماتى بەيجىڭ, گۋانچجوۋ, سيان, ءۇرىمجى, حانچجوۋ جانە سانيا قالالارىمەن تىكەلەي اۋە رەيستەرى ارقىلى بايلانىسقان. جاڭا باعىت قولدانىستاعى جەلىنى تولىقتىرىپ, اي سايىن 150-دەن استام رەيس ورىندالاتىن ەكى ەل اراسىنداعى اۋە قاتىناسىنىڭ جيىلىگىن ارتتىرادى.