جاڭالىقتار
شاۆكات راحمونوۆ UFC-دەن نەگە شەتتەتىلدى?

فوتو: ينستاگرام
قازاقستاندىق فايتەر شاۆكات راحمونوۆ چەمپيوندىق بەلبەۋ ءۇشىن جەكپە-جەكتەن ن ۋاقىتشا شەتتەتىلدى, دەپ حابارلايدى Skifnews.kz اقپارات پورتالى Tengri Sport-قا سىلتەمە جاساپ.
UFC كوممەنتاتورى الەكسەي ءۆولوديننىڭ پىكىرىنشە, امەريكالىق سپورتشى شون برەدي قازىر شاۆكاتتىڭ ديۆيزيونىندا جاڭا كوشباسشىعا اينالۋى مۇمكىن.
شون برەدي UFC Fight Night 255 تۋرنيرىندە بريتاندىق لەون ەدۆاردستى ءتورتىنشى راۋندتا جەڭىپ, ۇلكەن سەرپىلىس جاسادى. بۇل جەڭىستەن كەيىن ول جارتىلاي ورتا سالماقتاعى رەيتينگتىڭ ءبىرىنشى ساتىسىنا كوتەرىلدى.
برەدي قازىر ەدۆاردستى ىعىستىرىپ, ۋاقىتشا كوشباسشى بولدى. ول تيتۋل ءۇشىن جەكپە-جەككە ءبىرىنشى كەزەكتە تۇرۋى مۇمكىن. ال شاۆكاتقا, وكىنىشكە قاراي, ءبىر جەكپە-جەك وتكىزۋگە تۋرا كەلەتىن سياقتى. ويتكەنى ول بۇعان دەيىن ۇسىنىلعان تيتۋلدىق كەزدەسۋگە جاراقاتىنا بايلانىستى شىعا المادى, – دەدى ۆولودين.
UFC جاڭارتىلعان رەيتينگىنە سايكەس, برەدي قازىر 1-ورىندا, ال شاۆكات 2-ورىنعا ءتۇستى. چەمپيوندىق بەلبەۋدىڭ قازىرگى يەگەرى – بەلال مۋحامماد, ول 2024 جىلدىڭ شىلدەسىندە ەدۆاردستى جەڭىپ تيتۋلعا قول جەتكىزگەن.
بەلال مۋحامماد ەندى العاشقى تيتۋلدى 2025 جىلدىڭ 10 مامىرىندا UFC 315 تۋرنيرىندە اۆستراليالىق دجەك دەللا ماددالەناعا قارسى جەكپە-جەكتە قورعايدى. بۇل تۋرنير كاناداداعى مونرەال قالاسىندا وتەدى.
ايتا كەتەيىك, باستاپقىدا بەلال مەن شاۆكات اراسىنداعى جەكپە-جەك جوسپارلانعان بولاتىن, بىراق شاۆكات جاراقاتىنا بايلانىستى جەكپە-جەكتەن باس تارتۋعا ءماجبۇر بولدى. بۇل – ولاردىڭ جەكپە-جەگىنىڭ ەكىنشى رەت وتپەي قالۋى. بۇعان دەيىن جەلتوقسان ايىنداعى UFC 310 تۋرنيرىندە بەلال جەكپە-جەكتەن شەتتەتىلىپ, ونىڭ ورنىنا شىققان يرلانديالىق يەن گەرري تورەشىلەر شەشىمىمەن شاۆكاتتان جەڭىلىپ قالعان.