«سheck up جاسادى…» – دەپۋتات ەرمۇرات باپيدى الدەكىمدەر ۋلاۋى مۇمكىن بە?

دەپۋتاتتىڭ: «دياگنوز بەلگىسىز… ۋلانۋ مەن ۋلاندىرۋعا قاتىستى كۇدىك بار دەيدى… كلەتكالىق-مولەكۋريالىق نەگىزدە دياگنوستيكا قاجەت ەكەن… كورەرمىز… امان بولايىق, اعايىن!», – دەگەن جازباسىنان سوڭ جۇرتتىڭ ويى سان-ساققا جۇگىردى. بىرەۋلەر مۇنى «رەسەيلىك اگەنتتەردىڭ ءىسى بولۋى مۇمكىن» دەسە, ەندى بىرەۋلەر «انالاردان ءبارىن كۇتۋگە بولادى» دەپ ەسكى قازاقستان وكىلدەرىن مەڭزەيدى. «دەموكراتيا دەپ شاپقىلاپ ءجۇرىپ شارشاعانسىز عوي» دەپ جازبا قالدىرعاندار دا بار.

NEGE تىلشىسى ەكى كۇننەن بەرى اۋرۋحانادا قارالىپ جۇرگەن ءماجىلىس دەپۋتاتى ەرمۇرات باپيدىڭ وزىنە حابارلاسىپ, جاعدايىن سۇرادى.

– ۋلانۋ دەگەن بولجام بار. بىراق بۇل ءالى ناقتىلانعان جوق. مەندە بۇل دەرت ناۋرىز ايىنان بەرى پايدا بولدى. سول كەزدە قر پرەزيدەنتىنىڭ ءىس باسقارماسى مەديتسينالىق ورتالىعىنىڭ اۋرۋحاناسىنا 15-20 كۇن جاتىپ, اناليز تاپسىرعاندا دا دياگنوزى تابىلمادى. قان, گيستولوگيا, پارازيت, بيوپسياعا دەيىن, بارلىق ءاناليزدى تاپسىردىم. قازاقستاندا قانداي دياگنوزعا تاپسىرۋعا بولادى, ءبارىن الدى.

بىلايشا ايتقاندا, chek up جاسادى عوي. ەشتەڭە تابىلمادى. ماماندار كونسيليۋم كەزىندە «ۋلانۋىڭ مۇمكىن» دەگەن نۇسقا كەلتىرىپ, جاسۋشالىق دەڭگەيدە تەكسەرۋ كەرەكتىگىن ايتتى.

قولىمداعى ىسىك اۋىق-اۋىق شىعىپ تۇرادى. ءبىر اپتانىڭ, ون كۇننىڭ ىشىندە قىشىپ باستايدى دا, ءىسىپ كەتەدى. قىشىعان كەزدە جانىمدى شىعارادى. سوسىن ىسىگەن جەردىڭ تەمپەراتۋراسى كوتەرىلەدى. ۋلانۋ مەن ۋلاندىرۋعا قاتىستى ايتقانىم – بولجام عانا. سوندىقتان ناقتى ايتۋعا كەلمەيدى. دارىگەرلەر دە: «بۇل ءبىزدىڭ 40 جىلدىق تاجىريبەمىزدە بولماعان دۇنيە», – دەپ كۇدىكتەنىپ وتىر. قازىر شەتەلدىك ءبىر كلينيكاعا قارالۋ كەرەك دەگەن ۇسىنىس ايتتى. ياعني, جاسۋشانىڭ ءبارىن تەكسەرۋ قاجەت. جاعدايىم وسىنداي.