«شەنەۋنىكتەر ۇرلاعان زاتتاردى كورگەندە جيىركەنگەن كەزىم بولدى» – ءاليحان بايمەنوۆ

فوتو: اشىق دەرەككوز

قازاقستاندا باي-باعلانداردىڭ ءسىز بەن ءبىزدىڭ اقشامىزعا ساتىپ العان زاتتارى كەزەكتى اۋكتسيونعا شىعارىلادى, دەپ جازادى qandastar.kz

قاراشانىڭ 22-ءسى مەن 26-سى ارالىعىندا استانا مەن الماتىدا بىرنەشە كوممەرتسيالىق نىسان ساتىلادى. اكتيۆتەردى قايتارۋ جونىندەگى كوميتەتتىڭ كومەگىمەن تاركىلەنگەن قىمبات زاتتار e-kazyna سايتىندا اۋكتسيونعا تۇسەدى.

atameken.business kaz جازعانداي, قۇنى 2 ملن-نان 100 ملن-عا دەيىن باعالاناتىن كارتە, بۋلگاري سەكىلدى الەمدىك برەندتەر ءوز باعاسىنان ارزانعا ساۋدالانادى.

ال زاڭسىز اكتيۆتەردى قايتارۋ جونىندەگى كوميسسيانىڭ مۇشەسى ءاليحان بايمەنوۆ «ەل تانيتىن ازاماتتار قازاقتىڭ قازىناسىن جۇگەنسىز جەي بەرگەن»,-  دەپ وتىر.  

«بىزگە الىپ كەلىپ ولاردىڭ نە يەلەنگەنىن كورسەتكەندە جيىركەنگەن كەزىم بولدى. كەيبىر بەلگىلى ادامدار قولىنا ىلىككەننىڭ ءبارىن الا بەرگەن. سونى كورگەن كەزدە ويلايسىڭ. نە دەگەن جۇگەنسىزدىك? مەملەكەت يەلىگىندەگى دۇنيەنى باسا بەرگەن, باسا بەرگەن. مەن اتايىن قارجى جيناعان ۇلكەن حالىقتىڭ اۋزىندا جۇرگەن ازاماتتاردىڭ ءبىرازى سونىڭ ىشىندە بار», – دەدى.