شەرزات ىسىنە كۋاگەر ەكى قىزدىڭ ءبىرى ەلميرا نۇربەكوۆا سوتتا سويلەدى, بىراق?..

فوتو: سكرين

شەرزات پولات ءىسى بويىنشا بۇعان دەيىن اتى اتالعان ەكى قىزدىڭ ءبىرى – ەلميرا نۇربەكوۆا سوتتا كۋالىك بەردى, دەپ حابارلايدى qandastar.kz Orda.kz سايتىنا سىلتەپ.

ونىڭ سوزىنشە, وقيعاعا دەيىن ەكى كۇن بۇرىن ايىپتالۋشىلار ابزال, نۇرقياس جانە راۆيل ونىڭ قۇربىسى دانامەن تانىسقان. قالعان جىگىتتەردى تانىمايتىنىن ايتىپ بەردى.

«راۆيل ماعان جازىپ, كەزدەسۋدى ۇسىندى. مەن وعان كەشكە دەيىن جۇمىستا بولاتىنىمدى ايتتىم. كەيىنىرەك دانا ماعان «راۆيل كەزدەسكىسى كەلىپ جاتىر» دەپ جازدى. ءبىز مەيرامحاناعا باردىق, سول جەردە جىگىتتەر وتىر ەكەن. ءبىز دانامەن بىرگە بيلەدىك, كەيىن سولارمەن ءبىر ۇستەلگە وتىردىق. ۇستەلدە نۇرقياس, راۆيل, ابزال, ازامات جانە توقتاۋباەۆتار بولعان. ستولدا اراق-شاراپ تا تۇردى», – دەدى ول سوتتا.

كۋاگەردىڭ ايتۋىنشا, مەيرامحانا جابىلعاننان كەيىن ءبارى سىرتقا شىققان. ول ۇيگە قايتقىسى كەلگەنىمەن, جىگىتتەر ولاردى دۇكەنگە كىرىپ-شىققان سوڭ, اپارىپ تاستايتىنىن ايتقان.

«مەن ۇيگە قايتامىز دەگەندە, نۇرقياس پەن راۆيل: «ءبىز ءوزىمىز اپارىپ تاستايمىز, تەك ءبىرىنشى دۇكەنگە بارامىز» دەدى. دۇكەن الدىنا كەلگەندە, جىگىتتەر كولىكتەن سەكىرىپ ءتۇسىپ, دۇكەنگە قاراي بەتتەدى. ءبىز العاشىندا دانامەن كولىكتە قالدىق, كەيىن تەمەكى الۋ ءۇشىن دۇكەنگە كىردىك. ىشتە ءبىز تانىمايتىن ەكى ەر ادام تۇردى. ءبىز: «تەمەكى ساتىلا ما?» دەپ سۇرادىق. سولاردىڭ ءبىرى: «جوق, دۇكەن جابىق. شىعىڭدار, ايتپەسە قازىر قارۋىمدى شىعارىپ, اتا باستايمىن» دەدى. وسى كەزدە بىرەۋ ەسىكتى ىشتەن تەۋىپ جىبەردى. سول دۇكەننىڭ الدىندا نۇرقياستى بىرەۋ ۇرىپ جىبەردى», – دەيدى ەلميرا.

ونىڭ سوزىنشە, ءدال وسى ساتتە كۇتپەگەن ارەكەت بولعان. بەلگىسىز ءبىر ادام اۋاعا وق اتىپ, جاعداي كۇرت شيەلەنىسكەن.

«سول كەزدە ساقالى مەن باس كيىمى بار ەر ادام دۇكەننىڭ جانىنان جۇگىرىپ شىعىپ, ەكى رەت اسپانعا وق اتتى. مەن راۆيلگە: «قويىڭدار, توبەلەسپەڭدەر» دەپ توقتاتۋعا تىرىستىم. بىراق ول تىڭداماي, توبەلەسكە قوسىلىپ كەتتى. ءبىز دانامەن شەتكە شىقتىق», – دەدى كۋاگەر.

سوتتاعى جاۋاپ بارىسىندا ول وقيعا كەزىندە توبە شاشى تىك تۇرعانىن جاسىرمادى.

«سول ساتتە ايەل ادامنىڭ كومەك سۇراعان ايقايىن ەستىدىك. جەردە ەس-ءتۇسسىز جاتقان بالانى كورىپ, تۇرىپ قالدىم. اتىس داۋسىنان كەيىن ءبارى دۇكەننىڭ ارتىنا قاراي جۇگىرىپ كەتتى. شىنىمدى ايتسام, جۇرەگىم اۋزىما تىعىلىپ, قوزعالا الماي تۇرىپ قالدىم. بىرەۋ قولىمنان تارتىپ, كولىككە قاراي جەتەلەپ الىپ كەتتى. كىم ەكەنىن كورمەدىم», – دەدى ول.

كەتىپ بارا جاتقاندا كۋاگەر بەينەجازبا جاساپ تۇرعان ايەلدى كورىپ, جەدەل جاردەم شاقىرۋىن سۇراعان. ودان كەيىن قىزدار جىگىتتەرمەن بىرگە تاۋعا قاراي كەتكەن.

«ءبىر ايەلدىڭ ءبارىن بەينەجازباعا ءتۇسىرىپ تۇرعانىن كورىپ, «جەدەل جاردەم شاقىرىڭىز» دەپ ايتىپ ۇلگەردىم. كەيىن كولىكپەن تاۋعا قاراي جول تارتتىق. جولدا ءبىر جەرگە توقتادىق. جىگىتتەر: «كولىكتە كۇتىڭدەر» دەپ شىقتى. ارتىنشا قارا دجيپ كەلدى, ءبىز سوعان وتىرىپ, تومەن قاراي بەتتەدىك. سودان سوڭ پوليتسيا توقتاتتى», – دەدى ەلميرا نۇربەكوۆا سوتتا.

ەلميرا نۇربەكوۆا بۇل وقيعادان كەيىن اۋاعا مىلتىق اتقان ەر ادامدى جابىرلەنۋشىلەرمەن بەتتەستىرۋ كەزىندە تانىعانىن ايتتى.

«كەيىن جابىرلەنۋشىلەرمەن بەتتەستىرۋ كەزىندە اۋاعا وق اتقان, ساقالى بار, باسىندا باس كيىمى (كەپكاسى) بولعان ەر ادامدى بىردەن تانىدىم», – دەدى ەلميرا.

كۋاگەر سوت بارىسىندا جابىرلەنۋشى تاراپتىڭ ادۆوكاتى مەيىرمان شەكەەۆ ەلميرا نۇربەكوۆانىڭ تەرگەۋ بارىسىندا بەرگەن جاۋابىن وقىدى. ول كەزدە نۇربەكوۆا «بالانىڭ ماماسى «كومەكتەسىڭدەر, بالامدى ءولتىرىپ جاتىر دەپ ايعايلادى. ارى قاراي مەن دە جۇگىرىپ بارىپ, اراسىنا قارا ءتۇستى كۇرتە كيگەن ادامدى تارتىپ الدىم. ءبىر كەزدە قاراسام, مىلتىقتى الىپ شىققان بالا جەردە جاتىر ەكەن. ءۇستى قان بولدى. بالا ىشىمەن جاتقان كەزدە ابزال قولىنداعى پىشاعىمەن ارقا جاعىنان ۇرىپ جاتقانىن كوردىم جانە «قويىڭدار» دەگەن كەزدە راۆيل مەنى كولىك جاققا باردى دا, كولىككە وتىر دەپ كەتتى» دەپ جاۋاپ بەرگەن. بىراق بۇل ءسوزىن نۇربەكوۆا سوت كەزىندە راستاماي, باسقاشا جاۋاپ بەردى.

مەن ول كەزدە ەسەڭگىرەگەن كۇيدە ەدىم. مەن جاۋاپتى ورىسشا بەردىم. ۆيدەونى كورسەتسەڭىز بولادى», — دەدى كۋاگەر.

ادۆوكات وعان «ءسىز قىلمىستىق جاۋاپكەرشىلىك بارى جونىندە ەسكەرتىلدىڭىز, سوندا وسى جاۋاپتان باس تارتىپ وتىرسىز با?» دەپ سۇرادى.

مەن جاۋابىمنان باس تارتپايمىن. مەن بارلىق شىندىقتى ايتىپ وتىرمىن. قالاي بولدى – سولاي ايتىپ وتىرمىن», — دەدى ەلميرا نۇربەكوۆا.