شەرزاتتىڭ اكەسى: ادىلدىك جوق, قازاقستاننان كوشەمىز

فوتو: اشىق دەرەككوز

ZTB news ارناسىندا تالعارداعى تراگەدياعا قاتىستى جۇرتتى ءدۇر سىلكىندىرگەن ۆيدەو جاريالاندى. 23 مينۋتتىق ۆيدەونىڭ تەرگەۋ مۇددەسىنە ساي تولىق جاريالانباعانى ايتىلادى. الايدا مارقۇم شەرزاتتىڭ اكەسىنىڭ قولىندا سۋىق قارۋ بار تۇس تاسپاعا تۇتاس ىلىگىپتى.

شەرزاتتىڭ اكەسى قارجاۋباي نۇرىموۆ  تاراعان ۆيدەوعا وتكىر رەاكتسيا ءبىلدىردى, دەپ حابارلايدى qandastar.kz جۋرناليست سامال يبراەۆانىڭ جازباسىنا سىلتەمە جاساپ.

ء“بارىن كورىپ وتىرمىن. ادىلەتتى شەشىم كۇتكەم. ادەيى تاراتىپ وتىر ۆيدەونى. قانداي جاعداي بولسا دا ايتايىن. مەن قان توكسەم, مەنى قارالاۋعا بولادى. مەن قان توككەن جوقپىن. مەنىڭ بالامدى اناسىنىڭ كوزىنشە ءولتىرىپ وتىر. ودان باسقا نە دالەل كەرەك ولارعا? وتباسىمدى قالاي قورعاۋىم كەرەك سوندا?

ولار ءبىرىنشى پىشاقپەن كەلدى عوي, مەن سوندا رۋچكامەن شىعۋىم كەرەك پە? جاتىپ الىپ تاياق جەۋىم كەرەك پە? ەندى مەن ادىلدىك بولادى دەگەنگە سەنبەيمىن. بالامنان ايىرىلىپ, ۇيىمنەن ايىرىلىپ وتىرعاندا, ەندى كەلىپ وسىلاي جاساپ جاتىر. امال تەك وتباسىمدى امان-ەسەن الىپ شىعىپ كەتۋىم كەرەك. قازاقستاننان كوشەمىز”, – دەگەن شەرزاتتىڭ اكەسى “Ulysmedia”-عا جاۋابىندا.

ايتا كەتەيىك, 4 قازاندا تالعاردا 16 جاستاعى ءجاسوسپىرىمدى ءولتىردى. شەرزات پولات دۇكەندە اكەسىنە كومەكتەسىپ جۇرگەندە ساتىپ الۋشىنىڭ بىرەۋى سىرا ءۇشىن اقشا تولەۋدەن باس تارتقان. سودان جانجال شىعىپ, ەكى جاق سوزگە كەلىسپەي قالدى. وقيعا ورنىنا ءبىر توپ ادام كەلىپ, ءجاسوسپىرىمدى عانا ەمەس, ونىڭ اكەسى مەن اعاسىن سوققىعا جىقتى. وكىنىشكە قاراي شەرزات بولات پىشاق جاراقاتىنان كوز جۇمدى.

ءجاسوسپىرىمدى ولتىرگەن كۇدىكتىلەردىڭ وسىعان دەيىن دە سوتتالعاندارى بەلگىلى بولدى. مۇناڭ سوڭ جابىرلەنۋشى تاراپتىڭ ءۇيى ورتەنىپ, باسپاناسىز قالدى.

كوپشىلىك بۇل قىلمىسقا “حۋتور بانداسىنىڭ”, اتاپ ايتقاندا حاسان قاسىمباەۆتىڭ قاتىسى بارىن جارىسا ايتتى. بىراق بۇگىن Orda.kz جۋرناليستىنە باندانىڭ جەتەكشىسى اتانعان حاسان سۇحبات بەردى. ول تالعارداعى جاعدايعا ەشقانداي قاتىسى جوق ەكەنىن العا تارتىپ وتىر.

«رۋىم – البان. الماتى وبلىسى كەگەن اۋىلىندا 1984 جىلى دۇنيەگە كەلدىم. اكەمنىڭ جۇمىستارىمەن تالعار اۋدانى رىسقۇلوۆ اۋىلىنا كوشىپ كەلدىم. وسى اۋىلدا 11-سىنىپتى ءبىتىردىم. ءال-فارابي اتىنداعى قازۇۋ-دا حيميا فاكۋلتەتىندە وقىدىم. كەيىن قىزىلوردا وبلىسىنا جۇمىسقا باردىم. 2011 جىلى قايتا تالعارعا كەلدىم. سودان بەرى كاسىپپەن اينالىسامىن”, – دەدى ول.

حاسان وزىنە تاعىلعان ايىپتى جوققا شىعاردى. ءتىپتى, قازىر ول اۋىلدا تۇرمايتىنىن ايتقان.

“مەن الگى كۇنگە دەيىن تۇسىنبەيمىن, نەگە ولاي دەپ جاتقانىن. سەبەبى مەن ادال جۇمىس ىستەپ جۇرگەن اداممىن. ادامدار جالعىز مەنى عانا ەمەس, باۋىرلارىمدى دا قارالاپ جاتىر. تۋعان اعام اسلان قاسىمباەۆ اكىم اپپاراتىندا جۇمىس ىستەيدى. پوليتسيادا, پروكۋراتۋرادا تۋىستارىم جوق. ەرجان دەگەن ءىنىم 2017 جىلدان بەرى جازاسىن وتەپ جاتىر. ول 14 جىلعا باس بوستاندىعىنان ايىرىلعان. ول تاقىرىپ مەن ءۇشىن اۋىر, ونى قوزعاماي اق قويىڭىز”, – دەگەن حاسان.

بۇعان دەيىن باق-تا اۋىل تۇرعىندارى حاساندى  “حاسان باۋىرىمىز وسى اۋىلدىڭ بىرلىگىنە, تىرلىگىنە شاپقىلايدى “ دەپ اقتاعانى جاريالاندى.