شەرزاتتىڭ اكەسى ءىنىسىنىڭ ءمايىتىن ءوزى تاپقانىن ايتتى

فوتو: ۆيدەو سكرين

تالعار قالاسىنىڭ شەت جاعىنان مارقۇم شەرزات پولاتتىڭ اعاسى نۇرقانات عايىپباەۆتىڭ ءمايىتى تابىلدى. شەرزاتتىڭ اكەسى قارجاۋباي نۇرىموۆ ءىنىسى كوز جۇمعان جەردى ۆيدەوعا ءتۇسىرىپ, ونى قالاي تاۋىپ العانىن باياندادى, دەپ جازدى qandastar.kz

Stan.kz دەرەگىنشە, قارجاۋباي نۇرىموۆ ءىنىسىنىڭ ءمايىتىن ءوزى تاپقان. ونىڭ وقيعا ورنىنىڭ كورسەتكەن ۆيدەوسى جەلىدە تارادى. نۇرىموۆتىڭ سوزىنشە, ءىنىسى كولىگىن وتالعان كۇيى تاستاپ كەتىپ, وقيعا ورنىنا دەيىن جاياۋ بارعان.

ء«بىر كىسىلەر كولىكتى كورىپ, وسى جەردە دەپ ايتقاننان كەيىن بەيىتتىڭ باسىنا كەلدىك. كەلگەنىمىزدە كولىكتىڭ ەسىگى اشىق ەدى, ىشىندە ەكى تەلەفون بار. وتالىپ تۇرعان سياقتى, ناقتى ەسىمدە ەمەس. وسى جەردەن قاردىڭ ۇستىندەگى جالعىز ءىزدىڭ ارتىنان جۇردىك. جاردان ءتۇسىپ, تومەن تاس جولعا قاراي جۇرەدى. مىنا جەردەن ادامنىڭ ءتۇسۋى قيىن. جاردان ءتۇسىپ, 500-700 مەتر تاس جولعا قاراي جاقىندايدى. ءىزدىڭ ارتىنا ءتۇسىپ بارعانىمىزدا تراسساعا جەتە سالعان جەردە باۋىرىم وتىر, جان تاپسىرعان”, – دەيدى قارجاۋباي نۇرىموۆ.

قارجاۋباي نۇرىموۆ ءىنىسىنىڭ ەكى اياعى جەرگە ءتيىپ, ەركىن وتىرعانىن ايتتى.

«ەكى جاعى مۇسىلماندار مەن حريستيانداردىڭ بەيىتى. ەكى تاۋدىڭ ورتاسىمەن جۇرەدى دە, تۇندە جالعىز ءوزى. تاس جولعا جاقىنداپ قالعان جەردە بەتوننىڭ ارتىندا ەكى اياعى جەرگە ءتيىپ, بۇكتەلىپ وتىرعان كۇيىندە تابىلدى. موينىنا سىم بايلانعان. جارىقشامى بار سىم بۇتاققا بايلانعان. بىراق ول ەركىن وتىر. موينىنىڭ ءبىر جاعىندا عانا ءىز بايقالدى. تابىلعان جەردىڭ جانىندا عانا كولىك وتەتىن جول تۇر. بىراق ول كولىگىن تاۋ جاققا ەسىگىن اشىپ قالدىرىپ, وسى جەرگە دەيىن جاياۋ كەلگەن. مەنىڭ شىندىعىم وسى”, – دەيدى قارجاۋباي نۇرىموۆ.