Sherzattyń ákesi inisiniń máıitin ózi tapqanyn aıtty

Foto: vıdeo skrın

Talǵar qalasynyń shet jaǵynan marqum Sherzat Polattyń aǵasy Nurqanat Ǵaıypbaevtyń máıiti tabyldy. Sherzattyń ákesi Qarjaýbaı Nurymov inisi kóz jumǵan jerdi vıdeoǵa túsirip, ony qalaı taýyp alǵanyn baıandady, dep jazdy qandastar.kz

Stan.kz dereginshe, Qarjaýbaı Nurymov inisiniń máıitin ózi tapqan. Onyń oqıǵa ornynyń kórsetken vıdeosy jelide tarady. Nurymovtyń sózinshe, inisi kóligin otalǵan kúıi tastap ketip, oqıǵa ornyna deıin jaıaý barǵan.

«Bir kisiler kólikti kórip, osy jerde dep aıtqannan keıin beıittiń basyna keldik. Kelgenimizde kóliktiń esigi ashyq edi, ishinde eki telefon bar. Otalyp turǵan sııaqty, naqty esimde emes. Osy jerden qardyń ústindegi jalǵyz izdiń artynan júrdik. Jardan túsip, tómen tas jolǵa qaraı júredi. Myna jerden adamnyń túsýi qıyn. Jardan túsip, 500-700 metr tas jolǵa qaraı jaqyndaıdy. Izdiń artyna túsip barǵanymyzda trassaǵa jete salǵan jerde baýyrym otyr, jan tapsyrǵan”, – deıdi Qarjaýbaı Nurymov.

Qarjaýbaı Nurymov inisiniń eki aıaǵy jerge tıip, erkin otyrǵanyn aıtty.

«Eki jaǵy musylmandar men hrıstıandardyń beıiti. Eki taýdyń ortasymen júredi de, túnde jalǵyz ózi. Tas jolǵa jaqyndap qalǵan jerde betonnyń artynda eki aıaǵy jerge tıip, búktelip otyrǵan kúıinde tabyldy. Moınyna sym baılanǵan. Jaryqshamy bar sym butaqqa baılanǵan. Biraq ol erkin otyr. Moınynyń bir jaǵynda ǵana iz baıqaldy. Tabylǵan jerdiń janynda ǵana kólik ótetin jol tur. Biraq ol kóligin taý jaqqa esigin ashyp qaldyryp, osy jerge deıin jaıaý kelgen. Meniń shyndyǵym osy”, – deıdi Qarjaýbaı Nurymov.