شەتەلدىك ستۋدەنتتەر ابايدىڭ اندەرىن جاتقا بىلەدى

كوكشەتاۋدا ءبىلىم الاتىن شەتەلدىك ستۋدەنتتەر قازاق ءتىلىن ۇيرەنىپ ءجۇر. ءتىپتى كەيبىرى اباي شىعارمالارىن جاتقا بىلەدى

ەندى ولار قازاقتىڭ مۋزىكالىق اسپاپتارىنا دا دەن قويا باستاعان.

پاكىستاننان كەلگەن فايز ءالي مۋزىكاعا بالا كۇنىنەن عاشىق. ساباقتان تىس ۋاقىتىندا ۆوكالعا بارادى.

قازاق اندەرىمەن قوسا دومبىرا تارتۋدى ۇيرەنىپ ءجۇر. اسىرەسە ابايدىڭ شىعارماشىلىعىنا قاتتى اۋەس. ولەڭدەرىن وقىپ, اندەرىن ايتادى.
«قازاق تىلىنە دەگەن قىزىعۋشىلىق ءبىرىنشى كۋرستان باستالدى. قازاق ءتىلى ساباعى ماعان ۇنادى. مەن ۋنيۆەرسيتەتتەگى ۆوكال ستۋدياسىنا جازىلدىم. ماعان اباي قۇنانباەۆتىڭ اندەرى ۇنايدى

. «كوزىمنىڭ قاراسى» جانە «جەلسىز تۇندە جارىق اي» اندەرىن ايتىپ, كوپتەگەن وبلىستىق, قالالىق بايقاۋلارعا قاتىستىم», — دەيدى ستۋدەنت فايز ءالي.
ال سابرينا ءمۋحاباتيدىڭ كوكشەتاۋعا كەلگەنىنە ەكى اي دا وتپەگەن. سوعان قاراماستان قازاقشا 300-گە تارتا ءسوز جاتتاپ العان. قازاق ءتىلى مەن پارسى ءتىلىنىڭ ۇقساستىعى كوپ. سول سەبەپتى ءتىل مەڭگەرۋ اسا قيىنعا سوقپادى, دەيدى.

ءبىز ءوزىمىز ءبىرىنشى اعىلشىن ءتىلىن وقىپ الدىق. سوسىن اعىلشىن تىلىمەن سالىستىرا وتىرىپ, ولاردى قازاق تىلىنە ۇيرەتىپ, قىزىقتىرا وقىتامىز. ونىڭ ۇستىنە ءبىز كوبىنە كوممۋنيكاتيۆتى داعدىلارىن دامىتۋعا باسا كوڭىل بولەمىز. ءبىز ەڭ ءبىرىنشى سوزدەردى جاتتاتقىزامىز. سول سوزدەردەن ءسوز تىركەستەرىن قۇراستىرامىز. سودان سويلەم قۇرۋعا ۇيرەتەمىز», — دەيدى ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ اعا وقىتۋشىسى انار بوقاەۆا.

شەتەلدەن كەلەتىن ستۋدەنتتەردىڭ دەنى مەديتسينا كافەدراسىندا ءبىلىم الادى. بولاشاق دارىگەرلەردىڭ سوزىنشە, قازاقستاندىق ءبىلىم جۇيەسىنىڭ مارتەبەسى جوعارى. سەبەبى ۋنيۆەرسيتەتتەردەگى وقۋ باعدارلاماسى جىلدا جاڭارتىلىپ, زامان اعىمىنان قالمايدى.
«بىزدە 757 بالا وقيدى. سونىڭ 331-ءى اعىلشىن تىلىندە ءبىلىم الادى. شەتەلدىك ستۋدەنتتەردىڭ 95%-ءى ءۇندىستاننان كەلگەن. بانگلادەش, پاكىستان مەن اۋعانستاننىڭ بالالارى دا بار. وسى ستۋدەنتتەردىڭ 8-ءى «بولاشاق» باعدارلاماسى اياسىندا وقىپ جاتىر», — دەپ مالىمدەدى جوعارى مەديتسينا مەكتەبىنىڭ ديرەكتورى سۆەتلانا مۇراتبەكوۆا.

بيىل ۋنيۆەرسيتەت ۇستازدارى شەتەلدىك ستۋدەنتتەر ءۇشىن قازاقشا وقۋلىق قۇراستىرعان. سونىڭ كومەگىمەن ءتىلدى تەز ارادا مەڭگەرىپ الۋعا بولادى, دەيدى وقىتۋشىلار. قازىر ۋنيۆەرسيتەتتە الەمنىڭ 16 ەلىنەن 500-گە تارتا ستۋدەنت ءبىلىم الادى.