شيزوفرەنياعا شالدىققان ءجاسوسپىرىم بالانى دارەتحاناعا يتەرىپ جىبەرگەن: اناسى 20 ميلليون تەڭگە وتەماقى تولەيدى

سارىاعاش اۋدانىنا قاراستى سىرگەلى اۋىلىنداعى 17 جاستاعى قىز 3 جاستاعى قىزدى ءولتىرىپ, تاعى ءبىر جەتكىنشەكتى ولىمگە يتەرمەلەگەن. بۇل تۋرالى Qandastar.kz اقپارات پورتالى Orda.kz پورتالىنا سڭلتەمە جاساپ  حابارلايدى.

2024 جىلدىڭ كوكتەمىندە اۋىل تۇرعىندارى كوشە دارەتحاناسىنان ءۇش جاسار ارايدىڭ (ادامداردىڭ ەسىمدەرى وزگەرتىلگەن) مايىتىن تاۋىپ العان. مارقۇم بالانىڭ جاقىندارى باستاپقىدا بۇل قايعىلى وقيعا جازاتايىم دەپ ويلاعان. كۋاگەرلەر بولماعاندىقتان, كوپشىلىك بالانىڭ بايقاۋسىزدا شۇڭقىرعا ءتۇسىپ كەتكەنىنە سەندى.

اراعا ەكى اي سالىپ سول كوشە دارەتحاناسىندان التى جاسار اسىلىم دا اجال قۇشا جازدادى. جاقىن ماڭدا جۇرگەن اۋىل تۇرعىنى بالانىڭ جان داۋسىن ەستىپ, كومەككە ۇمتىلعان. ول قىزدى دارەتحانانىڭ شۇڭقىرىنان شىعارىپ ۇلگەرگەن. بالا شۇڭقىرعا جارتىلاي ءتۇسىپ كەتكەن ەكەن. اسىلىم كومەك كەلگەنشە دارەتحانا ەدەنىنىڭ جيەگىنەن ۇستاپ تۇرعان.

اسىلىمدى قۇتقارىپ العان سوڭ ول ءوزىن كورشى تۇراتىن 17 جاستاعى باعيلا ەسىمدى قىزدىڭ دارەتحانا شۇڭقىرىنا يتەرىپ جىبەرگەنىن ايتتى. قىزدىڭ بۇل مالىمەتتەرى بويىنشا قىلمىستىق ءىس قوزعالدى. تەرگەۋ بارىسىندا ءۇش جاسار ارايدىڭ ءولىمى دە وسى وقيعامەن بايلانىستى بولۋى مۇمكىن ەكەنى انىقتالدى.

“تەرگەۋ حاتتاماسىنا سايكەس, 2024 جىلدىڭ 13 شىلدە كۇنى كەشكە باعيلا اسىلىمدى دارەتحاناعا قاراي ەرتىپ اپارىپ, شۇڭقىرعا يتەرىپ جىبەرمەك بولعان. اسىلىم ەكى قولىمەن جيەگىنەن ۇستاپ ۇلگەرىپ, جىلاپ جىبەرگەن. وسى ساتتە باعيلا ونى تىستەپ, شاشىنان تارتىپ, بار كۇشىمەن يتەرىپ جىبەرۋگە تىرىسقان. سول ساتتە جاقىن ماڭداعى ەر ادام بالانى قۇتقارىپ قالدى”, – دەلىنگەن حابارلامادا.

تەرگەۋ بارىسىندا اراي مەن اسىلىمدى دارەتحاناعا جاسوسپىرىم قىز يتەرىپ جىبەرگەنى دالەلدەندى. كەيىن باعيلانىڭ پسيحيكالىق اۋرۋعا شالدىققانى انىقتالدى. ونىڭ نە ىستەپ جاتقانىن تولىق تۇسىنگەن-تۇسىنبەگەنىن سوت شەشۋى ءتيىس.

الايدا باعيلانىڭ اناسى قىزىنىڭ پسيحيكالىق دەرتكە شالدىققانىن بىلمەگەن.

«سوت وتىرىسىندا باعيلانىڭ زاڭدى وكىلى رەتىندە قاتىسقان اناسى: قىزىنىڭ پسيحيكالىق اۋرۋعا شالدىققانىن بىلمەگەنىن ايتتى. بىراق قىزدىڭ بىرنەشە رەت وزىنە قول سالماق بولعانىن مويىندادى. مىسالى, ول سىركە سۋىن ىشپەك بولعان. سونداي-اق اناسى قىزىن مولداعا اپارىپ, دۇعا جاساتىپ جۇرگەنىن دە جەتكىزدى», – دەلىنگەن ءىس ماتەريالدارىندا.

سوت-مەديتسينالىق پسيحياتريالىق ساراپتاما ناتيجەسىندە قىزدان «شيزوفرەنيا بەلگىلەرى بار ءجىتى پوليمورفتى پسيحوزدىق بۇزىلىس» انىقتالدى. ول پسيحياتريالىق ەسەپكە قويىلدى. زاڭ بويىنشا پسيحيكالىق اۋرۋى راستالعان ادامدار قىلمىستىق جاۋاپكەرشىلىكتەن بوساتىلادى.

«سوت قىلمىستىق كودەكستىڭ 95-بابى 4-بولىگىنىڭ تالاپتارىنا سۇيەنە وتىرىپ, ايىپتالۋشىعا ارنايى پسيحياتريالىق ستاتسيوناردا قارقىندى باقىلاۋمەن ماجبۇرلەپ ەمدەۋدى تاعايىنداۋ قاجەت دەپ ەسەپتەيدى. جاسالعان قوعامدىق قاۋىپتى ارەكەتىنىڭ سيپاتى مەن پسيحيكالىق جاي-كۇيىنە بايلانىستى ول وزىنە دە, اينالاسىنداعى ادامدارعا دا ەرەكشە قاۋىپ توندىرەدى, ءارى ۇنەمى جانە قاتاڭ باقىلاۋدا بولۋعا مۇقتاج», – دەلىنگەن سوت ۇكىمىندە.

سوت جابىرلەنۋشى تاراپتىڭ ازاماتتىق تالابىن جارتىلاي قاناعاتتاندىردى. ءجاسوسپىرىم قىزدىڭ اناسى قازا بولعان ارايدىڭ وتباسىنا 20 ميلليون تەڭگە مورالدىق وتەماقى تولەۋگە مىندەتتەلدى.