Shızofrenııaǵa shaldyqqan jasóspirim balany dárethanaǵa ıterip jibergen: Anasy 20 mıllıon teńge ótemaqy tóleıdi

Saryaǵash aýdanyna qarasty Sirgeli aýylyndaǵy 17 jastaǵy qyz 3 jastaǵy qyzdy óltirip, taǵy bir jetkinshekti ólimge ıtermelegen. Bul týraly Qandastar.kz aqparat portaly Orda.kz portalyna sńlteme jasap  habarlaıdy.

2024 jyldyń kókteminde aýyl turǵyndary kóshe dárethanasynan úsh jasar Araıdyń (adamdardyń esimderi ózgertilgen) máıitin taýyp alǵan. Marqum balanyń jaqyndary bastapqyda bul qaıǵyly oqıǵa jazataıym dep oılaǵan. Kýágerler bolmaǵandyqtan, kópshilik balanyń baıqaýsyzda shuńqyrǵa túsip ketkenine sendi.

Araǵa eki aı salyp sol kóshe dárethanasyndan alty jasar Asylym da ajal qusha jazdady. Jaqyn mańda júrgen aýyl turǵyny balanyń jan daýsyn estip, kómekke umtylǵan. Ol qyzdy dárethananyń shuńqyrynan shyǵaryp úlgergen. Bala shuńqyrǵa jartylaı túsip ketken eken. Asylym kómek kelgenshe dárethana edeniniń jıeginen ustap turǵan.

Asylymdy qutqaryp alǵan soń ol ózin kórshi turatyn 17 jastaǵy Baǵıla esimdi qyzdyń dárethana shuńqyryna ıterip jibergenin aıtty. Qyzdyń bul málimetteri boıynsha qylmystyq is qozǵaldy. Tergeý barysynda úsh jasar Araıdyń ólimi de osy oqıǵamen baılanysty bolýy múmkin ekeni anyqtaldy.

“Tergeý hattamasyna sáıkes, 2024 jyldyń 13 shilde kúni keshke Baǵıla Asylymdy dárethanaǵa qaraı ertip aparyp, shuńqyrǵa ıterip jibermek bolǵan. Asylym eki qolymen jıeginen ustap úlgerip, jylap jibergen. Osy sátte Baǵıla ony tistep, shashynan tartyp, bar kúshimen ıterip jiberýge tyrysqan. Sol sátte jaqyn mańdaǵy er adam balany qutqaryp qaldy”, – delingen habarlamada.

Tergeý barysynda Araı men Asylymdy dárethanaǵa jasóspirim qyz ıterip jibergeni dáleldendi. Keıin Baǵılanyń psıhıkalyq aýrýǵa shaldyqqany anyqtaldy. Onyń ne istep jatqanyn tolyq túsingen-túsinbegenin sot sheshýi tıis.

Alaıda Baǵılanyń anasy qyzynyń psıhıkalyq dertke shaldyqqanyn bilmegen.

«Sot otyrysynda Baǵılanyń zańdy ókili retinde qatysqan anasy: qyzynyń psıhıkalyq aýrýǵa shaldyqqanyn bilmegenin aıtty. Biraq qyzdyń birneshe ret ózine qol salmaq bolǵanyn moıyndady. Mysaly, ol sirke sýyn ishpek bolǵan. Sondaı-aq anasy qyzyn moldaǵa aparyp, duǵa jasatyp júrgenin de jetkizdi», – delingen is materıaldarynda.

Sot-medıınalyq psıhıatrııalyq saraptama nátıjesinde qyzdan «shızofrenııa belgileri bar jiti polımorfty psıhozdyq buzylys» anyqtaldy. Ol psıhıatrııalyq esepke qoıyldy. Zań boıynsha psıhıkalyq aýrýy rastalǵan adamdar qylmystyq jaýapkershilikten bosatylady.

«Sot Qylmystyq kodekstiń 95-baby 4-bóliginiń talaptaryna súıene otyryp, aıyptalýshyǵa arnaıy psıhıatrııalyq staıonarda qarqyndy baqylaýmen májbúrlep emdeýdi taǵaıyndaý qajet dep esepteıdi. Jasalǵan qoǵamdyq qaýipti áreketiniń sıpaty men psıhıkalyq jaı-kúıine baılanysty ol ózine de, aınalasyndaǵy adamdarǵa da erekshe qaýip tóndiredi, ári únemi jáne qatań baqylaýda bolýǵa muqtaj», – delingen sot úkiminde.

Sot jábirlenýshi taraptyń azamattyq talabyn jartylaı qanaǵattandyrdy. Jasóspirim qyzdyń anasy qaza bolǵan Araıdyń otbasyna 20 mıllıon teńge moraldyq ótemaqy tóleýge mindetteldi.