Shyǵys Qazaqstan oblysy «óz ýaqyt beldeýine kóshti»

Foto:gov.kz

Shyǵys Qazaqstandaǵy Katonqaraǵaı aýdanyna qarasty 17 aýyldyń turǵyndary óz ýaqyt beldeýine kóship, jańa keste boıynsha jumys istep jatyr, dep habarlaıdy qandastar.kz

Jergilikti ákimdiktiń málimetinshe, 2025 jyldyń 5 qańtarynan bastap Qatonqaraǵaı aýdanynda bes kúndik jumys aptasy engizilip, jumys ýaqyty saǵat 08:00-den 17:30-ǵa deıin jalǵasady. Saǵat 12:00-den 13:30 túski úzilis ýaqyty bolyp belgilendi.

Qatonqaraǵaı aýdany ákimdiginiń ishki saıasat bóliminiń basshysy Gúlnár Jaqsylyqova ótken jyldyń sońynda aýdanǵa jumys toby kelip, ýaqyt beldeýi máselesin talqylaǵanyn aıtty. Turǵyndarmen kezdesý barysynda pılottyq jobany iske qosyp, jumys kúnin saǵat 08:00-den bastaý týraly sheshim qabyldandy.

“Qatonqaraǵaıda tań erte atady, biz shyǵystamyz, saǵat beste jaryq bolyp turady. Aýylda adamdar da erte turady. Sondyqtan kópshilik birden kelisti. Aýdan ákiminiń ókimimen 5 qańtardan bastap tańǵy segizden bastap jumys isteımiz”, – dedi Gúlnár Jaqsylyqova.

Ákimdiktiń málimetinshe, aýdandaǵy 40 mekemeniń barlyǵy jańa jumys kestesine kóshti. Degenmen kóbine beıimdelýdiń de qajeti bolmady. О́ıtkeni mektepter, balabaqshalar men aýrýhanalar onsyz da tańǵy saǵat 08:00-den bastap jumys isteıtin kórinedi.

“Bul óte yńǵaıly. Buǵan deıin balalardy saǵat 08:00-de aparatynbyz, sosyn 09:00-de ǵana jumysqa kirisetinbiz. Al qazir jumysqa bara jatqanda balany balabaqshaǵa aparyp, erterek bosap, úıge kelip, biraz sharýany bitirip úlgerýge bolady. Bul bizge qolaıly. Burynǵy kestege oralǵymyz kelmeıdi”, – deıdi ishki saıasat bóliminiń basshysy.

sn.kz jazǵandaı, jergilikti turǵyndardyń bul sheshimin kásipkerler de qoldaǵan.

“Biz týrıstik aımaqpyz, kóp adamdar azyq-túlik dúkenine tańnan keledi, al biz ol kezde ashyq bolamyz. Bul barlyǵyna yńǵaıly”, – deıdi kásip ıeleri.

Resmı málimetterge sensek, pılottyq joba Katonqaraǵaı aýdanynyń Qabyrǵa, Belqaraǵaı, О́rnek, Topqaıyń, Barlyq, Korobıha jáne Aqsý, О́rel, Arshaty, Berel, Jambyl, Qaıyńdy, Qyzyl Juldyz, Aqqaınar, Eńbek, Shyńǵystaı, Jańaúlgi aýyldarynda engizildi.