Shymkent ákiminiń orynbasary Berdenovke oq atqan kúdiktige qandaı aıyp taǵyldy – Bas prokýratýra túsindirdi

Foto: stan.kz

Shymkent ákiminiń orynbasary Rýslan Berdenovke jasalǵan qastandyq boıynsha tergeýdiń barysyn Bas prokýratýra túsindirdi, dep jazdy qandastar.kz

Prokýratýra is-materıaldary eki bap boıynsha qaralyp jatqanyn málimdedi. Bul týraly Stan.kz aqparat agenttigi Tengrinews.kz portalyna silteme jasap habarlaıdy.

Vedomstvo ókilderi isti Shymkent qalasynyń polıııa departamenti tergep jatqanyn habarlady. Tergeý Qylmystyq kodeksiniń 24-baby 3-bóligi (Qylmysty isteýge oqtalý) jáne 99-baby 2-bóliginiń 6-tarmaǵy (Basqa adamdardyń ómirine qaýipti tásilmen jasalǵan kisi óltirýge oqtalý) boıynsha júrgizilip jatyr.

Prokýratýra qazir tergeý amaldary júrgizilip jatqanyn, alaıda zań talaptaryna sáıkes istiń egjeı-tegjeıi jarııa etilmeıtinin atap ótti.

Bul rette zańger Aıman Aısına qylmystyq quqyqtaǵy “kisi óltirýge oqtalý” uǵymynyń qalaı qoldanylatynyn túsindirdi. Onyń aıtýynsha, kisi óltirýge oqtalǵan adamǵa dál sol kisi óltirý jasaǵandaı jaza taǵaıyndalady.

“Oqtalý qylmys tolyq jasalmasa da, ol jaı daıyndyqtan aýyr qylmys bolyp esepteledi. Qylmystyq kodekste oqtalý jasaǵan adamǵa sol qylmys boıynsha jaza belgilenetini kórsetilgen. Iaǵnı eger bul kisi óltirý bolsa, onda jaýapkershilik kisi óltirý babyna sáıkes belgilenedi. Oqtalý baby silteme arqyly 99-bapqa tireledi. Sondyqtan qylmys oqtalý retinde saralansa da, jaza kisi óltirý boıynsha qaralady”, – dedi Aısına.

Qylmystyq kodekstiń 99-baby 2-bóligine sáıkes kisi óltirgeni úshin 15 jyldan 20 jylǵa deıin bas bostandyǵynan aıyrý nemese ómir boıyna bas bostandyǵynan aıyrý jazasy qarastyrylǵan. Sonymen qatar, sot múlikti tárkileý týraly sheshim qabyldaýy múmkin nemese onsyz shektelýi múmkin.

Atalǵan baptyń 6-tarmaǵynda qylmys (nemese osy jaǵdaıdaǵydaı qylmysqa oqtalý) basqa adamdardyń ómirine qaýip tóndiretin tásilmen jasalǵany kórsetilgen.
Eske salaıyq, buǵan deıin Shymkent ákiminiń orynbasary Rýslan Berdenovti atyp ketkenin jazǵan edik. Shabýyldyń aldyn ala sebebi retinde birneshe nusqa aıtyldy. Biri Rýslan Berdenov shabýyl jasaǵan adamnyń áıeline tıisti dese, endi biri bul jaǵdaıdy Shymkenttegi qurylys salasynda tártip ornatýmen baılanystyrdy.