شىمكەنتتە اسكەرگە شاقىرىلعان جىگىت تەرەزەدەن سەكىرىپ كەتكەن

فوتو: اشىق دەرەككوز

شىمكەنتتە اسكەرگە شاقىرىلعان جىگىت اسكەري كوميسسارياتتىڭ تەرەزەسىنەن سەكىرىپ كەتكەن. بۇل تۋرالى qandastar.kz ۆرەميا باسىلىمىنا سىلتەمە جاساپ حابارلايدى. 

تۇركىستان وبلىسى تولەبي اۋدانى, تاعاينا اۋىلىنىڭ 18 جاستاعى تۇرعىنى بەحرۋز راۆشانبەكوۆتى شىمكەنت قالاسىنا اجەسىمەن كەزدەسۋگە كەلگەندە كوشەدە اسكەريلەر كەزدەسىپ, “اسكەرگە شاقىرىلۋشى” رەتىندە اسكەري كوميسسارياتقا الىپ كەتكەن. جىگىتتى كولىككە كۇشتەپ وتىرعىزىپ, قابىلداۋ پۋنكتىنە اپارعان. سول جەردە جىگىت اسكەري كوميسسارياتتىڭ تەرەزىنەن سەكىرىپ كەتكەن.

بەحرۋزدىڭ ايتۋىنشا, جولدا اسكەريلەر ونى اسكەرگە شاقىرۋدان بوساتۋ ءۇشىن اقشا سۇراي باستاعان. اۋەلى 500 مىڭ تەڭگە, كەيىن 800 مىڭ تەڭگە سۇراعان. بەحرۋزدىڭ اكەسى اۆازبەك عاينانوۆ تا اسكەري كوميسساريات قىزمەتكەرلەرىنىڭ ۇلىن بوساتۋ ءۇشىن اقشا سۇراعانىن ايتتى.

قازىر اسكەري تەرگەۋ ءبولىمى اسكەري كوميسساريات قىزمەتكەرلەرىنىڭ قىزمەتتىك وكىلەتتىكتەرىن اسىرا پايدالانۋى بويىنشا ىستى تەكسەرىپ جاتىر. ال قالالىق قورعانىس دەپارتامەنتى ءوزىنىڭ ىسكەرلىك بەدەلىن قورعاۋ ءۇشىن زارداپ شەككەن جىگىتتىڭ اكەسىنىڭ ۇستىنەن سوتقا شاعىم تۇسىرگەن.

جابىرلەنۋشىنىڭ اكەسىنە قاتىستى سوتقا ارىز بەرگەن شىمكەنت قالالىق قورعانىس ىستەرى جونىندەگى دەپارتامەنتىنىڭ شاعىمىندا عاينانوۆ جاۋاپكەر رەتىندە ىسكەرلىك بەدەل مەن ابىرويعا نۇقسان كەلتىردى دەپ ايىپتالىپ, ونىڭ سوزدەرى شىندىققا جاناسپايتىنى ايتىلعان. تالاپ ارىزدى تولەبي اۋدانىنىڭ اۋداندىق سوتى قابىلدادى. الايدا بىرنەشە سوت وتىرىسىنان كەيىن دەپارتامەنت تالاپ ارىزىنان باس تارتتى.

ال اسكەري تەرگەۋ باسقارماسى ۇش اي بويى «قىزمەتتىك وكىلەتتىكتەرىن اسىرا پايدالانۋ» بابى بويىنشا قوزعالعان ىستىڭ ءمان-جايىن تەرگەپ جاتىر. الايدا بەحرۋزدىڭ ادۆوكاتتارى ءىستىڭ باسقا قىلمىستىق باپ بويىنشا تەرگەلۋى كەرەك ەكەنىن اتاپ ءوتتى.

«جىگىتتى ۇستاعان جانە ونى ءىس جۇزىندە باس بوستاندىعىنان ايىرعان قىزمەتكەرلەردىڭ ءىس-ارەكەتى «ادام ۇرلاۋمەن بايلانىستى ەمەس زاڭسىز باس بوستاندىعىنان ايىرۋ» بابى بويىنشا قىزمەت بابىن پايدالانىپ, الدىن الا ءسوز بايلاسۋ ارقىلى ادامدار توبىندا جاسالعان قىلمىس بولىپ ەسەپتەلەدى. بارلىق بەلگىلەر بار, ءبىز ونى دالەلدەيمىز», – دەدى زاڭگەر ەۆگەني ياۆورسكي.

بۇل وقيعاداعى ەڭ قىزىعى, بەكرۋز راۆشانبەكوۆ اسكەردەن جالتارۋشى رەتىندە ىزدەۋدە بولماعان, وعان شاقىرۋ قاعازى مۇلدەم كەلمەگەن, ويتكەنى ول كەزدە 18 جاستاعى جىگىت تولەبي اۋدانىندا دا, شىمكەنت قالاسىندا دا تۇرعىلىقتى جەرى بويىنشا اسكەري ەسەپتە تۇرماعان.