Shymkentte áskerge shaqyrylǵan jigit terezeden sekirip ketken

Foto: ashyq derekkóz

Shymkentte áskerge shaqyrylǵan jigit áskerı komıssarıattyń terezesinen sekirip ketken. Bul týraly qandastar.kz Vremıa basylymyna silteme jasap habarlaıdy. 

Túrkistan oblysy Tólebı aýdany, Taǵaına aýylynyń 18 jastaǵy turǵyny Behrýz Ravshanbekovti Shymkent qalasyna ájesimen kezdesýge kelgende kóshede áskerıler kezdesip, “áskerge shaqyrylýshy” retinde áskerı komıssarıatqa alyp ketken. Jigitti kólikke kúshtep otyrǵyzyp, qabyldaý pýnktine aparǵan. Sol jerde jigit áskerı komıssarıattyń terezinen sekirip ketken.

Behrýzdyń aıtýynsha, jolda áskerıler ony áskerge shaqyrýdan bosatý úshin aqsha suraı bastaǵan. Áýeli 500 myń teńge, keıin 800 myń teńge suraǵan. Behrýzdyń ákesi Avazbek Ǵaınanov ta áskerı komıssarıat qyzmetkerleriniń ulyn bosatý úshin aqsha suraǵanyn aıtty.

Qazir áskerı tergeý bólimi áskerı komıssarıat qyzmetkerleriniń qyzmettik ókilettikterin asyra paıdalanýy boıynsha isti tekserip jatyr. Al qalalyq qorǵanys departamenti óziniń iskerlik bedelin qorǵaý úshin zardap shekken jigittiń ákesiniń ústinen sotqa shaǵym túsirgen.

Jábirlenýshiniń ákesine qatysty sotqa aryz bergen Shymkent qalalyq qorǵanys isteri jónindegi departamentiniń shaǵymynda Ǵaınanov jaýapker retinde iskerlik bedel men abyroıǵa nuqsan keltirdi dep aıyptalyp, onyń sózderi shyndyqqa janaspaıtyny aıtylǵan. Talap aryzdy Tólebı aýdanynyń aýdandyq soty qabyldady. Alaıda birneshe sot otyrysynan keıin departament talap aryzynan bas tartty.

Al áskerı tergeý basqarmasy úsh aı boıy «qyzmettik ókilettikterin asyra paıdalaný» baby boıynsha qozǵalǵan istiń mán-jaıyn tergep jatyr. Alaıda Behrýzdyń advokattary istiń basqa qylmystyq bap boıynsha tergelýi kerek ekenin atap ótti.

«Jigitti ustaǵan jáne ony is júzinde bas bostandyǵynan aıyrǵan qyzmetkerlerdiń is-áreketi «adam urlaýmen baılanysty emes zańsyz bas bostandyǵynan aıyrý» baby boıynsha qyzmet babyn paıdalanyp, aldyn ala sóz baılasý arqyly adamdar tobynda jasalǵan qylmys bolyp esepteledi. Barlyq belgiler bar, biz ony dáleldeımiz», – dedi zańger Evgenıı Iavorskıı.

Bul oqıǵadaǵy eń qyzyǵy, Bekrýz Ravshanbekov áskerden jaltarýshy retinde izdeýde bolmaǵan, oǵan shaqyrý qaǵazy múldem kelmegen, óıtkeni ol kezde 18 jastaǵy jigit Tólebı aýdanynda da, Shymkent qalasynda da turǵylyqty jeri boıynsha áskerı esepte turmaǵan.