شىمكەنتتەن استانا قالاسىنا باعىت العان ۇشاقتا جولاۋشى ەسىنەن تانىپ قالدى

فوتو:istockphoto

شىمكەنتتەن استانا قالاسىنا ۇشىپ بارا جاتقان Fly Arystan اۋەكومپانياسىنىڭ رەيسىندە توتەنشە جاعداي بولىپ, 20 جاستاعى ستۋدەنت ەسىنەن تانىپ قالدى. دابىلعا بورتسەرىكتەر بىردەن جاۋاپ بەردى, ولار بورتتاعى دارىگەرلەردى كومەككە شاقىرعان, – دەپ حابارلايدى qandastar.kz

دەنساۋلىق ساقتاۋ مينيسترلىگىنىڭ مالىمەتىنشە, كومەككە جوعارى بىلىكتى مامان رەانيماتولوگ, «پەدياتريا جانە بالالار حيرۋرگياسى عىلىمي ورتالىعى» اق جاڭا تۋعان نارەستەلەردىڭ انەستەزيولوگياسى, رەانيماتسياسى جانە قارقىندى تەراپياسى بولىمشەسىنىڭ مەڭگەرۋشىسى, نەيروحيرۋرگ جانە كارديولوگ نۇرسۇلتان اۋەلبەك ۇلى قۇربانبەكوۆ جاۋاپ بەردى.

پاتسيەنتتى قاراپ-تەكسەرۋ كەزىندە ول ءالسىز ءيمپۋلستى جانە نولدىك دەڭگەيدەگى قان قىسىمىن انىقتادى, بۇل اۋىر جاعدايدى كورسەتتى. دارىگەرلەردىڭ جەدەل جانە ۇيلەستىرىلگەن ءىس-قيمىلدارىنىڭ ارقاسىندا قىزدىڭ جاعدايى بىرنەشە مينۋتتان كەيىن ايتارلىقتاي جاقساردى, — دەيدى دارىگەر.

انامنەزدە قانداعى گەموگلوبين دەڭگەيى نەبارى 61 ەكەنى انىقتالدى جانە قىزدىڭ ايتۋىنشا, ول ەمدەلمەگەن, بۇل ەسىن جوعالتۋدىڭ سەبەپتەرىنىڭ ءبىرى بولۋى مۇمكىن.
وسىعان بايلانىستى دارىگەرلەردەن ءارى قاراي تەكسەرۋ جانە وسىنداي جاعدايلارعا اكەلۋى مۇمكىن اۋرۋلاردى بولدىرماۋ ءۇشىن مامانداردان كونسۋلتاتسيا الۋ ۇسىنىلدى, — دەلىنگەن حابارلامادا.