ءسىم رەسمي وكىلى ايبەك سمادياروۆ ۋكرايناداعى جاعدايعا قاتىستى تۇسىنىكتەمە بەردى

فوتو: شىق دەرەككوز

قر ءسىم رەسمي وكىلى ايبەك سمادياروۆ ۋكرايناداعى جاعدايعا قاتىستى تۇسىنىكتەمە بەردى, دەپ جازدى qandastar.kz

ء«بىزدىڭ ۋكرايناداعى ەلشىلىگىمىز شتاتتىق رەجيمدە جۇمىس ىستەپ كەلەدى. سىرتقى ىستەر مينيسترلىگىندە الەمدەگى جاعدايعا مونيتورينگ جاسايتىن ارنايى احۋالدىق ورتالىق بار. ءبىزدىڭ مالىمەتىمىزگە سايكەس كيەۆتەگى شەتەلدىك ديپلوماتيالىق كورپۋس ءوز جۇمىسىن جالعاستىرۋدا جانە ازاماتتارىن ەۆاكۋاتسيالاپ جاتقان جوق. قازاقستاندىقتاردان دا ەۆاكۋاتسيالاۋ بويىنشا وتىنىشتەر تۇسكەن جوق جانە قازىرگى ۋاقىتتا ارنايى ۇشاقتاردى جىبەرۋ جوسپاردا جوق.

وزدەرىڭىز بىلەتىندەي, ۋكراينادا سوعىستىڭ جالعاسىپ جاتقانىنا ەكى جىلدان استى. كەتەمىن دەگەن ازاماتتار ەلدەن شىعىپ كەتكەن. بىراق ءبىزدىڭ ەسەبىمىز بويىنشا ۋكراينادا قازىر 300-گە جۋىق قازاقستان ازاماتى بولۋى مۇمكىن. ناقتى سانىن ايتۋ قيىنعا سوعادى.

وعان قاراماستان, بىرنەشە كۇن بۇرىن ءبىز ۋكرايناداعى قازاقستاندىقتارعا ەل اۋماعىنان كەتۋ تۋرالى حابارلاما جاسادىق. قازاق ديپلوماتتارى ءوز جۇمىسىن تياناقتى اتقارىپ كەلەدى, ەگەر وتانداستارىمىزدان ءوتىنىش تۇسكەن جاعدايدا ولارعا بارلىق قاجەت كومەكتى كورسەتەمىز. دەگەنمەن, جاعدايدىڭ ودان ءارى دامۋىنا بايلانىستى ءوز ارەكەتىمىزدى جاسايمىز», – دەپ حابارلادى ا.سمادياروۆ.