SQO-da qomaqty bıýdjet qarajaty urlanǵan

Foto: ashyq derekkóz

Soltústik Qazaqstan oblysynyń prokýrorlary qonys aýdarý baǵdarlamasy boıynsha bıýdjet qarajatyn urlaý faktilerin anyqtady, dep habarlaıdy qandastar.kz

«Qadaǵalaý organy tekserýler aıasynda áleýmettik sharttyń qabyldanǵan mindettemelerin oryndamaý jáne turǵyn úı qunyn asyra baǵalaý maqsatynda qoldanystaǵy zańnamanyń óreskel buzylýyn anyqtady.

Osylaısha, Aıyrtaý, Ǵ.Músirepov, Jambyl aýdandarynda Qonys aýdarý baǵdarlamasyna qatysýshylar Áleýmettik kodekstiń talaptaryna jáne adamdardy erikti túrde qonys aýdarý qaǵıdalarynyń talaptaryna qaramastan, turǵyn úı satyp alý shyǵyndaryn óteý úshin memlekettik ótemaqyny barynsha úlken kólemde alý maqsatynda  olardyń naqty qunyn jasandy túrde asyra kórsetken.

Osyndaı zańsyz áreketterden memleketke jalpy somasy 11,3 mln teńge shyǵyn keltirilgen», – delingen habarlamada.

Osy faktilerge súıene otyryp, prokýratýra Qylmystyq kodekstiń 190-babyna «Alaıaqtyq» sáıkes, sotqa deıingi tergep-tekserý jumystaryn bastady.

Aýdandyq sot úkimderimen Baǵdarlamanyń 3 qatysýshysy bir jyldan úsh jylǵa deıingi merzimge bas bostandyǵyn shekteýge sottaldy (zańdy kúshine engen).

Sonymen birge, Áleýmettik shart boıynsha óz mindettemelerin buza otyryp, memleketten qarjylaı kómek alǵan Qonys aýdarý baǵdarlamasyna qatysýshylar turaqty turý úshin qonys aýdarǵan ornynan Respýblıkanyń basqa aımaqtaryna kóshken.

Osyǵan qaramastan, jergilikti atqarýshy organdardyń sheneýnikteri 103,6 mln teńge kólemindegi tólemderdi óndirip alý sharalaryn qoldanbaǵan.

Prokýrorlyq qadaǵalaý aktilerine sáıkes, jergilikti atqarýshy organdardyń 25 qyzmetkeri (onyń ishinde Mansap ortalyqtary fılıalynyń 11 basshysy) tártiptik jaýapkershilikke tartylyp, 19,1 mln teńge kólemindegi bıýdjet qarajaty óteldi.

Qalǵan somaǵa talap aryzdar sotqa berilip, qaralýda.

Bıýdjettik qarajatty jumsaý máselesi oblystyq prokýratýranyń baqylaýynda.