سولتۇستىك قازاقستاندا 13 جاستاعى قىز تۇسىك جاساتتى

فوتو: pediatrinfo.ru

بىلتىر سولتۇستىك قازاقستان وبلىسىندا جاسوسپىرىمدەر 14 تۇسىك جاساتقان. جۇكتىلىكتى توقتاتقانداردىڭ اراسىندا 13 جاستاعى قىز دا بار. وسى جاستاعى تاعى ءبىر قىز انا بولدى, دەپ حابارلايدى qandastar.kz سايتى «پەتروپاۆلوۆسك.news» سىلتەمە جاساپ.

ايماقتا بارلىعى 15 پەن 49 جاس ارالىعىنداعى بالا كوتەرە الاتىن جاستاعى 116 مىڭنان استام ايەل تۇرادى. 2880 ايەل جۇكتىلىك بويىنشا ديسپانسەرلىك ەسەپتە تۇر. ولاردىڭ 52 پايىزى ءارتۇرلى جىنىستىق پاتولوگيالاردان زارداپ شەگەدى. ال 25 ايەلدى دارىگەرلەر «قولمەن» باقىلايدى, ويتكەنى جۇكتى بولۋعا بولمايدى.

وبلىستىڭ دەنساۋلىق ساقتاۋ باسقارماسىنىڭ باس شتاتتان تىس اكۋشەر-گينەكولوگى ەلەنا كاليۋجنايانىڭ ايتۋىنشا, بارلىق جۇكتى ايەل ءوڭىردىڭ مەديتسينالىق مەكەمەلەرىندە ەسەپتە تۇر.

«وبلىستاعى ءجاسوسپىرىم قىزدار سانى 10 950. ءتورت پايىزى اۋىر جىنىستىق پاتولوگيادان زارداپ شەگەدى. بارلىعى ەسەپتە. ەرتە جۇكتىلىكتىڭ زيانىن تۇسىندىرۋدە ۇلكەن ءرول اتقارامىز. جاستار ورتالىقتارىندا اڭگىمەلەسۋلەر وتكىزەمىز, ءتىپتى كونتراتسەپتسيا قۇرالدارىن تەگىن بەرەمىز. وكىنىشكە قاراي, بيىل ءتورت ءجاسوسپىرىم قىز مەديتسينالىق تۇسىك جاساتقان», – دەدى ەلەنا كاليۋجنايا.

وبلىستا بارلىعى 18 وتباسىن جوسپارلاۋ كابينەتى جۇمىس ىستەيدى, ياعني ءاربىر ەمحانادا. كەز كەلگەن ايەل كەڭەس الۋ ءۇشىن تەگىن جۇگىنە الادى, ال كەيبىرەۋلەرىنە ءتىپتى كونتراتسەپتيۆتەر بەرىلەدى.

سونداي-اق وبلىس اۋماعىندا 8-800-080-81-50 ءانونيمدى سەنىم تەلەفونى بار. 5 ايدا وعان 114 ادام جۇگىندى.