Soltústikke kósh: Baǵdarlama sheńberinde 1 mlrd jymqyrylǵan

Fotokollaj: Azattyq Rýhy

Prokýratýra organdary azamattardy ońtústikten soltústik óńirlerge erikti túrde qonys aýdarý baǵdarlamasyn iske asyrýǵa bólingen memlekettik qarajattyń jumsalýyna taldaý júrgizdi, – dep habarlaıdy qandastar.kz arasha.kz-ke silteme jasap.

Nátıjesinde jalǵan qujattardy paıdalana otyryp azamattardy jalǵan qonys aýdarý jolymen 1 mlrd teńgeden astam qarajatty jymqyrý jáne ony teris paıdalaný faktileri anyqtalǵan.

«Qonys aýdarýshylar bolyp jalǵan adamdar esepke alynǵan, al qujattar tómen baǵamen satyp alynǵan kórineý turýǵa jaramsyz nemese apatty ǵımarattarǵa rásimdelgen. Keıbir jaǵdaılarda azamattar ózderiniń qujat boıynsha qonys aýdarylǵanyn bilmegen de. Mundaı faktiler ShQO, Qaraǵandy, Aqmola, Qostanaı, Abaı jáne Ulytaý oblystarynda anyqtaldy», – delingen habarlamada.

Mysaly, Pavlodar oblysynyń Ýspen aýdanynda «Eńbek mobıldiligi ortalyǵy» KMM-niń qyzmetkeri arzan úılerdi taýyp, qonys aýdarýshylarǵa joǵary baǵamen satýdy usynyp, memleketten alynǵan qarajattyń bir bóligin ózine qaldyryp otyrǵan.

Qazir sotqa deıingi tergep-tekserý júrgizilip, ortalyqtyń qyzmetkeri úıqamaqqa alyndy.

ShQO-da qonys aýdarýshylar men satýshylar arasynda sóz baılasý jaǵdaılary anyqtaldy, olar memlekettik kómekti alý úshin jalǵan sharttar jasap, odan keıin bul qarajatty bólisken.

Odan ári azamattar burynǵy mekenjaılarynda tura bergen.

Soltústik Qazaqstan oblysynyń Mámlút aýdanynda qonys aýdarýshy úıdiń naqty baǵasy men memleketten tólengen qarajattyń arasyndaǵy aıyrmashylyqty ıemdenip alǵan.

Kúdikti alaıaqtyq jasaǵany úshin kináli dep tanylyp, bir jylǵa bas bostandyǵyn shekteýge sottaldy.

Jalpy prokýrorlar 20 sotqa deıingi tergep-tekserý isin bastady.

Tergeý barysynda qatysy bar barlyq adamdardy anyqtaý, olardy jaýapkershilikke tartý, sondaı-aq keltirilgen zalaldy óteý sharalary qabyldanýda.

Normatıvtik aktilerdegi olqylyqtardy joıýjáne baǵdarlamany iske asyrýdy baqylaý júıesin kúsheıtý maqsatynda Úkimetke qadaǵalaý aktisi engizildi.