Соңғы екі жылда білім беру саласында жемқорлықтан 17 миллиард теңге шығын келді – Антикор

Фото: видеодан скрин

Сыбайлас жемқорлыққа қарсы іс-қимыл агенттігі басшысының орынбасары Ұлан Сарқұлов Мәжіліс кулуарында білім беру саласындағы жемқорлыққа қатысты деректермен бөлісті. Бұл туралы  qandastar.kz  Stan.kz ақпарат агенттігіне сілтеме жасап хабарлайды.

Антикор басшысы орынбасарының айтуынша, білім беру саласын тексеру барысында “жағаұстатарлық жемқорлық деректері” анықталған. Сөзінше, соңғы екі жылда келген шығын 17 миллиард теңгеге жуықтаған.

“Бұл мәселе құзырлы органдар, тиісті министрлік тарапынан қаралып жатыр. Біз тексере бастаған соңғы екі жыл – 2022 және 2023 жылдары келген шығын 17 миллиард теңгеге жуықтайды. Бұл – өте үлкен сома. Мәселен, бір ғана Талдықорған қаласында білім бөлімінің басшысы, бас бухгалтер мен бірнеше мектеп директоры 4 миллиард теңгеге жуық қаржы жымқырған. Ұстау кезінде көліктен 1 миллиард теңгеге жуық ақша табылды. Осындай деректер өзге де аймақтарда анықталды”, – деді ол.

Ұлан Сарқұловтың мәлімдеуінше, білім беру саласындағы жемқорлық деректерін азайту үшін цифрландыру мәселесі қолға алынған.

“Біз де цифрландыру процесіне қатысып жатырмыз, цифрлық даму министрлігімен етене жұмыс істейміз. Қазір кей ақпараттық технологиялардың енгізілгенін көріп отырмыз. Оның үстіне жемқорлық деректері де азая түскен. 2024 жылы білім беру саласында жемқорлықтан келген шығын 7 миллион теңге шамасында”, – деп түйіндеді ол.

Еске салайық, бұған дейін Антикор басшысының орынбасары Ұлан Сарқұлов Алматыда сатылымға қойылған 2,4 миллиард теңгелік вилла антикордың бұрынғы қызметкеріне тиесілі деген ақпаратқа қатысты пікір білдірген еді.