ءوز كولىگىن ءوزى ورتەپ, بىرنەشە شەنەۋنىككە جالا جاپقان تارازدىق بلوگەر سوتتالدى

سوتتالۋشى ادامدى اۋىر قىلمىس جاسادى دەپ ايىپتاۋعا ۇلاسقان كورىنەۋ جالعان اقپارات تاراتقانى ءۇشىن ايىپتالدى, دەپ حابارلايدى Aikyn.kz.

№2 تاراز قالالىق سوتتىڭ جازۋىنشا, 2022 جىلدىڭ قازان ايىندا سوتتالۋشى نۇرلان قاناتوۆ ءوزىن ساياسي جاعدايدىڭ قۇربانى دەگەن وي قالىپتاستىرۋ ماقساتىندا كولىگىنىڭ ورتەنگەن بەينەجازبالارىن Facebook الەۋمەتتىك جەلىسىنە تاراتقان. سوتتىڭ مالىمەتىنشە, كولىكتى ورتەۋگە ءوزى تاپسىرىس بەرگەن.

سوسىن كولىگىنىڭ ورتەنگەنىن ۇيىمداستىرۋدا ايماقتاعى بىرنەشە لاۋازىمدى تۇلعانى ايىپتاپ, ءتيىستى ارىزبەن جامبىل وبلىسى پد-نا جۇگىنگەن.

«بوتەننىڭ مۇلكىن قاساقانا جويۋ فاكتىسى بويىنشا ءىس قوزعالىپ, قىلمىس قۇرامى بولماۋىنا بايلانىستى ءىس قىسقارعان.

وسىلايشا ك. قىلمىس جاسالعانى تۋرالى كورىنەۋ جالعان ءسوز جەتكىزگەن.

سوتتالۋشىنىڭ كىناسى كۋالەردىڭ ايعاقتارىمەن, بەينەجازبالارمەن, ايعاق زاتتار ارقىلى دالەلدەندى.

پروكۋرور سوتتالۋشىنى 5 جىل 4 ايعا باس بوستاندىعىنان ايىرۋدى سۇرادى.

سوتتالۋشى ءوز كىناسىن مويىندامادى», — دەپ جازدى ۆەدومستۆو.

قك 419-ب. 3-ب. سانكتسياسىندا 3 جىلدان 8 جىلعا دەيىن مەرزىمگە باس بوستاندىعىنان ايىرۋ جازاسى كوزدەلگەن.

قىلمىستىق جاۋاپكەرشىلىك پەن جازانى جەڭىلدەتەتىن ءمان-جاي رەتىندە ونىڭ كامەلەتكە تولماعان بالالارىنىڭ بار ەكەنى ەسەپكە الىندى.

جازانى اۋىرلاتاتىن ءمان-جاي جوق.

سوتتىڭ ۇكىمىمەن ك. 3 جىل 6 اي مەرزىمگە باس بوستاندىعىنان ايىرىلدى.

ۇكىم زاڭدى كۇشىنە ەنگەن جوق.