О́z kóligin ózi órtep, birneshe sheneýnikke jala japqan tarazdyq bloger sottaldy

Sottalýshy adamdy aýyr qylmys jasady dep aıyptaýǵa ulasqan kórineý jalǵan aqparat taratqany úshin aıyptaldy, dep habarlaıdy Aikyn.kz.

№2 Taraz qalalyq sottyń jazýynsha, 2022 jyldyń qazan aıynda sottalýshy Nurlan Qanatov ózin saıası jaǵdaıdyń qurbany degen oı qalyptastyrý maqsatynda kóliginiń órtengen beınejazbalaryn Facebook áleýmettik jelisine taratqan. Sottyń málimetinshe, kólikti órteýge ózi tapsyrys bergen.

Sosyn kóliginiń órtengenin uıymdastyrýda aımaqtaǵy birneshe laýazymdy tulǵany aıyptap, tıisti aryzben Jambyl oblysy PD-na júgingen.

«Bótenniń múlkin qasaqana joıý faktisi boıynsha is qozǵalyp, qylmys quramy bolmaýyna baılanysty is qysqarǵan.

Osylaısha K. qylmys jasalǵany týraly kórineý jalǵan sóz jetkizgen.

Sottalýshynyń kinási kýálerdiń aıǵaqtarymen, beınejazbalarmen, aıǵaq zattar arqyly dáleldendi.

Prokýror sottalýshyny 5 jyl 4 aıǵa bas bostandyǵynan aıyrýdy surady.

Sottalýshy óz kinásin moıyndamady», — dep jazdy vedomstvo.

QK 419-b. 3-b. sankııasynda 3 jyldan 8 jylǵa deıin merzimge bas bostandyǵynan aıyrý jazasy kózdelgen.

Qylmystyq jaýapkershilik pen jazany jeńildetetin mán-jaı retinde onyń kámeletke tolmaǵan balalarynyń bar ekeni esepke alyndy.

Jazany aýyrlatatyn mán-jaı joq.

Sottyń úkimimen K. 3 jyl 6 aı merzimge bas bostandyǵynan aıyryldy.

Úkim zańdy kúshine engen joq.