سۋ تاسقىنى. اۋە كۇشتەرىنە عانا سەنىپ وتىرعان اۋىل كوپ

اقتوبە وبلىسىنىڭ اسكەري ۇشقىشتارى اپاتتى ايماقتان مىڭنان اسا ادامدى ەۆاكۋاتسيالادى. سۋ باسقان اۋىل-ايماقتارعا 19 توننادان استام گۋمانيتارلىق كومەك جەتكىزدى.

ىسىنە ادال ازاماتتار اۋە كولىگىن باسقارۋدا كەيدە بەلگىلەنگەن ۋاقىتتى دا ەلەمەي, قاۋىپتى اۋماقتاردا دا قۇتقارۋ جۇمىستارىن جۇرگىزگەنىن جاسىرمايدى. قازىر تىكۇشاقتار شالعايداعى ويىل اۋىلىنىڭ تۇرعىندارىنا كومەككە كەلدى.

رۇستەم جايلىباەۆ – اسكەري اۋە كۇشتەرى قۇرامىنداعى جاس ۇشقىش. كوكتەمگى تاسقىن باستالعاننان بەرى سۋ باسقان ەلدى مەكەندەردى ارالاپ ءجۇر. جاقىندا وتە كۇردەلى قۇتقارۋ جۇمىستارىن جۇرگىزدى. اينالادا ەلەكتر باعاندارى بولعانىنا قاراماستان, تىكۇشاقتى اۋەدە ۇزاق ۇستاپ, قىستاقتا قالىپ قويعان جۇمىسشىلاردى ارقانمەن تارتىپ العان.

قۇتقارۋ وپەراتسياسى ويىل اۋدانىنداعى قىستاقتىڭ بىرىندە ءوتتى.   رۇستەم جايلىباەۆ, اعا ۇشقىش: – تىكۇشاقتىڭ قوناتىن جەرى قاۋىپتى بولدى. بىراق سوعان قاراماستان ءبىز سول ادامداردى قۇتقارىپ الدىق. ولار سۋدىڭ ورتاسىندا, ءشوپتىڭ ۇستىندە 4 ادام, 3 ادام تراكتوردىڭ ۇستىندە قالىپ قويعان. باسقا جەرگە بارا الماعان. ادامدار 4 كۇن سۋسىز, تاماقسىز سالقىندا وتىرعان. ۇشقىشتاردىڭ ەرلىگى مۇنىمەن شەكتەلمەيدى. قازىر وبلىستىڭ شالعاي ويىل اۋدانىنا گۋمانيتارلىق جۇك جونەلتىلىپ جاتىر.

سەبەبى اۋدان ورتالىعى باعىتىنداعى تاسجولدى سۋ شايىپ كەتكەن. اسكەريلەر بۇل جولى 2 تونناعا جۋىق ازىق-ت ۇلىك جەتكىزبەك. اسكەري قىزمەتشىلەر سۋ تاسقىنى باستالعان ۋاقىتتان بەرى كۇنى-ءتۇنى ەڭبەك ەتىپ جاتىر. ال سوڭعى كۇندەرى وبلىستىڭ ويىل اۋىلىنا تۇراقتى تۇردە گۋمانيتارلىق كومەك جەتكىزۋمەن كەلەدى. سەبەبى, اۋداننىڭ ەكى اۋىلىنداعى 300-دەن استام ءۇي سۋ استىندا قالدى. ال ونىڭ تۇرعىندارى قازىر اۋدان ورتالىعىنداعى ەۆاكۋاتسيالىق ورتالىقتاردا.  ويىلعا سۋعا كەتكەن ەلدى مەكەندەردەن مىڭنان استام ادام ەۆاكۋاتسيالاندى. باسىم بولىگى اسكەريلەردىڭ ارقاسىندا كوشىرىلدى. جاسۇلان دوسقۇلوۆ, قاراتال اۋىلىنىڭ تۇرعىنى: – ءبىزدىڭ تىلەگىمىز ەندى تەزدەتىپ شىعۋ. شىققاندا قايدا بارامىز, اۋىلعا بارعاندا ءۇيىمىز جوق. ءبىز وندا تۇرعىمىز كەلمەيدى, بەتىمىز قايتتى. بىلتىر دا وسىلاي, بيىل دا وسىلاي. ەندى قۇداي بىلەدى, نە بولاتىنىن. بولسا بىزگە باسقا ءبىر تىڭ جەردەن قۇمجارعان سياقتى, ءيا قالا سياقتى ءبىر جەردەن ءۇي بەرسە. مالدان ايىرىلدىق بارىنەن. شىعاناق بەرسيەۆ اۋىلىنا دا قاجەتتى زاتتار تىكۇشاقتارمەن كەلىپ جاتىر. قازىر ەلدى مەكەندە ونعا جۋىق ەر ادام قالعان. ولار ۇيلەردى قاراپ وتىر.

تالعات كۇلجانوۆ, ت.بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتى باستىعىنىڭ ورىنباسارى: – 28-نەن باستاپ, 150-دەن استام ۇشۋلار ءوتتى. 1100-دەن استام ادام ەۆاكۋاتسيالاندى جانە 19 توننادان استام گۋمانيتارلىق كومەك بۇكىل اۋىل-ايماقتارعا جەتكىزىلدى. اسىرەسە, ويىل اۋدانى جانە ىرعىز اۋدانىنداعى ايكە دەگەن, قوبدا اۋدانىنداعى كوكتال, كوكۇي دەگەن سياقتى اۋىلدارعا باردى جانە سول جاقتان ادامداردى قاۋىپسىز جەرگە جەتكىزدى. سۋ باسقان اۋداندارعا تىكۇشاقتاردى ءجيى جونەلتۋ جولعا قويىلعان. بۇل رەتتە توتەنشە جاعداي قىزمەتى, اۋا رايىن بولجاۋشى ماماندار جانە وزگە دە مەكەمە وكىلدەرى بىرلەسە ەڭبەك ەتىپ جاتىر.