جاڭالىقتار
سۋ تاسقىنىن بولجاۋعا جارتى ميللياردتان استام قارجى ءبولىندى
فوتو: Tengrinews.kz/ تۇرار قازانعاپوۆ
قازاقستان ۇكىمەتى سۋ تاسقىنىن بولجاۋ ءۇشىن باتيمەتريالىق زەرتتەۋلەرگە قاراجات ءبولدى, دەپ حابارلايدى Massaget.kz ءتىلشىسى مينيسترلەر كابينەتىنىڭ ءباسپاسوز قىزمەتىنە سىلتەمە جاساپ.
پرەزيدەنتتىڭ سۋ تاسقىنى كەزەڭىنە دايىندىق جونىندەگى تاپسىرمالارىن ىسكە اسىرۋ شەڭبەرىندە ۇكىمەت رەزەرۆىنەن باتيمەتريالىق زەرتتەۋلەر جۇرگىزۋگە شامامەن 576 ميلليون تەڭگە ءبولىندى. ءتيىستى قاۋلىعا قر پرەمەر-ءمينيسترى ولجاس بەكتەنوۆ قول قويدى.
بولىنگەن قاراجات سۋ جانە سۋارۋ مينيسترلىگىنە ارنالعان. قارجىلاندىرۋدىڭ نەگىزگى بولىگى جابدىقتار مەن تەحنيكالىق جاراقتاردى ساتىپ الۋعا, سونداي-اق زەرتتەۋلەر جۇرگىزۋ جونىندەگى قىزمەتتەرگە باعىتتالادى. اتاپ ايتقاندا, قاراجاتتى «قازسۋشار» شجق رمك «سۋ مەترولوگيا» فيليالىنا تىكەلەي ەلدىڭ سولتۇستىك, باتىس جانە ورتالىق وڭىرلەرىنىڭ سۋ تاسقىنىنا قاۋىپتى ۋچاسكەلەرىنە باتيمەتريالىق ءتۇسىرىلىم جۇرگىزۋگە باعىتتاۋ جوسپارلانىپ وتىر.
رەسپۋبليكالىق ماڭىزى بار سۋ قويمالارىن باتيمەتريالىق زەرتتەۋدى قوسا العاندا جۇمىستار 2025 جىلى جالعاسادى. الىنعان دەرەكتەر قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە جانە «قازاقستان عارىش ساپارى «ۇك» اق-عا سۋ تاسقىنىن بولجاۋ مەن مودەلدەۋدىڭ اقپاراتتىق جۇيەسىنە ەنگىزۋ ءۇشىن بەرىلەدى.
