“Sýııdke ıtermeleıdi”: Ishki ister mınıstrligi telefondaǵy qaýipti oıyndar týraly túsindirdi

Foto: pixabay.com

Áleýmettik jelilerde kishkentaı balanyń Schoolboy Runaway oıyny týraly ákesine aıtyp jatqan vıdeo tarady. Vıdeoǵa qatysty ishki ister mınıstrligi pikir bildirdi. Bul týraly qandastar.kz  Stan.kz aqparat agenttigine silteme jasap habarlaıdy.

Astana turǵyny óziniń balasynyń jáne onyń dostarynyń oınap júrgen oıynyn kórsetý arqyly qalǵan ata-analarǵa eskertý jasamaq bolǵan.

Vıdeoda bala aýladaǵy dostarynyń attaryn atap, oıynnyń sharty boıynsha qandaı tapsyrmalardy oryndaý kerek ekenin aıtady.

«Biz oıynnyń ishinde tapsyrmalardy oryndaımyz. Mysaly úıden qashyp dostaryńa barý, shópke sekirý, symdardyń ústimen júgirý, balyqshyǵa barý, kólge batyp ketý degen sııaqty», – deıdi bala.

Onyń aıtýynsha, tapsyrmalardy oryndaǵany úshin olarǵa upaılar beriledi, olardy dostar bir-birine maqtanyshpen kórsetedi.

Balanyń ákesi oıynǵa qatysty eskertý jasady.

«Bizdiń aýlanyń barlyq balalary osy oıyndy oınaıtyn bolyp shyqty. Bul sýııdke ákeletin oıyn sııaqty. Balalardy úıden qashýǵa, shatyrdan sekirýge, kólge batyp ketýge ıtermeleıdi. Men balamnyń telefonynan osyndaı nárselerdi baıqadym. Barlyq ata-analardan balalaryńyzben shuǵyl áńgime ótkizýdi suraımyn, bul ázil emes», – deıdi er adam.

Ishki ister mınıstrliginiń resmı ókili Shyńǵys Álekeshev vıdeoǵa qatysty túsinikteme berdi. Onyń aıtýynsha, mundaı oıyndar balalardy óz-ózine qol jumsaýǵa ıtermelemeıdi.

«Sońǵy ýaqytta qazaqstandyq messendjerlerde qaýipti oıyndar týraly aqparat taralýda. Mundaı oıyndar tikeleı sýııdke ıtermelemeıdi. Alaıda balalarǵa úıden qashýdy, ata-anasyna baǵıanbaýdy úıretedi. Bul balanyń psıhologııasyna áser etetini anyq», – dep atap ótti Álekeshev ishki ister mınıstrliginiń brıfınginde.

Osyǵan baılanysty bólim kámeletke tolmaǵandardyń ata-analary men zańdy ókilderine balalardy tárbıeleý men qadaǵalaýdyń mańyzdylyǵyn eske salady.

Mınıstrliktiń resmı ókili Qazaqstandaǵy balalar arasyndaǵy sýııdtiń negizgi sebepterin de atady. Olardyń arasynda ózin jalǵyz seziný, qarjylyq jaǵdaıdyń nashar bolýy, ata-analarmen jáne týystarymen aradaǵy qatynastyń durys bolmaýy, oqýdaǵy máseleler, ata-anasynyń ajyrasýy, jaqyn adamnyń qaıtys bolýy, jazadan qorqý jáne t.b sebepter bar.

О́z-ózine qol jumsaýdyń naqty sebepteri tek tergeýden keıin belgili bolatynyn aıtady ol.

«Qurmetti ata-analar, biz sizdi balalaryńyzdyń minez-qulqy men emoıonaldyq jaǵdaıyn muqııat baqylaýǵa shaqyramyz, olarmen ashyq dıalog júrgizińiz. Balaǵa sizdiń qoldaýyńyz ben túsinistik tanytýyńyz óte mańyzdy», – dedi Shyńǵys Álekeshev.

Eske salsaq, osyǵan deıin Almatyda eki oqýshy qyz toǵyzynshy qabattan qulap mert boldy. Keıin oqýshy qyzdardyń jaqyndary olardy buǵan ne ıtermelegenin aıtqan edi.