Syrttan kelgen qandastardyń jyl sońyna deıin ǵana múmkindigi bar – Saparbaev

Búgin Úkimete ótken baspasóz jıynynda vıe-premer Berdibek Saparbaev syrttan kelgen qandastarymyzdyń máselelerine qatysty saýalǵa jaýap berdi.

«Sońǵy kezderi áleýmettik jelilerde basqa memleketterde turatyn qandastar týraly máseleler kóbeıip ketti. Shynymen de, Elbasy durys aıtty. Qandastaryn týǵan jerine shaqyryp alǵan Qazaqstan dúnıedegi az ǵana memleketterdiń biri. Sizder jaqsy biletindeı, ótken ýaqyttyń ishinde 1 mıllıonnan astam qandasymyz Qazaqstanǵa kóship keldi. Olardyń barlyǵyna kómek jasalady. Al endi bizge kómek jasalmady degen túsiniksiz. Olardy zerttep qaraý kerek», – deıdi Berdibek Saparbaev.

Onyń aıtýynsha, syrttan kelgen qandastarymyzdyń barlyǵy shyǵyny memlekettiń moıynynda. Osy maqsattar boıynsha 25 jyldyń ishinde 150 mlrd teńgedeı qarjy jumsalǵan eken.

«Pavlodar men Shyǵys Qazaqstanda, Shymkent qalasynda aýyldar salyndy. Odan basqa, alty óńirde keletin bizdiń otandastarymyzdy Qazaqstannyń zańyna, ómirine, saltyna beıimdeý úshin ońaltý ortalyqtary boı kóterdi. Odan keıin árbir syrt memleketten keletin otandastarymyzdyń jol shyǵyndary, kúnkóriske ketetin shyǵyndary, jumysqa ornalastyrý, balalaryn mektepke, balabaqshaǵa ornalastyrý, medıınalyq qyzmetpen qamtý – barlyǵy memlekettiń moınynda. Qazirgi esep boıynsha, ótken 25 jyldyń ishinde 150 mlrd teńgedeı qarjy jumsalypty. Ol jumys endi jalǵasyn taýyp jatyr. Osy ótken 7 aıdyń ishinde 6 myńnan astam qandas kóship keldi. Bul jumys jalǵasyn tabady», – dedi vıe-premer.

Úkimet basshysynyń orynbasary Qazaqstan azamattyǵyn ala almaı júrgen qandastarymyz osy jyldyń sońyna deıin múmkindikti paıdalaný kerektigin de aıtty.

«Keıbir qandastarymyz der kezinde qujattaryn tapsyrmaǵandyqtan, Qazaqstan azamattyǵyn ala almaı júr. Ol qujattyń merzimi bir-aq jyl. Elbasynyń tapsyrmasyna sáıkes, merzim osy jyldyń aıaǵyna deıin sozyldy. Sony paıdalanyp, azamattyq ala almaı júrgen qandastarymyz azamattyǵyn alýy kerek», – deıdi Berdibek Saparbaev.

BAQ.KZ tilshisi Bek TО́LEÝOV