جاڭالىقتار
تابىسى ايىنا 3 مىڭ دوللاردان اساتىن شەتەلدىكتەر قازاقستانعا ارنايى ۆيزا الادى
فوتو: gov.kz
تۋريزم جانە سپورت مينيسترلىگىنىڭ مالىمەتىنشە, بۇل ۆيزا جۇمىس پەن دەمالىستى, ساياحات پەن قاشىقتان جۇمىس ىستەۋدى بىرىكتىرەتىن شەتەلدىك تۋريستەرگە ارنالعان. مينيسترلىك جاڭا ۆيزالىق رەجيمدى ەنگىزۋ كەزىندە پاندەميادان كەيىن وسىعان ۇقساس باعدارلامالاردى ءساتتى جۇزەگە اسىرعان 50-دەن استام ەلدىڭ حالىقارالىق تاجىريبەسى ەسكەرىلگەنىن اتاپ ءوتتى, دەپ حابارلايدى qandastar.kz
Stan.kz-تىڭ جازۋىنشا, Neo Nomad ۆيزاسىن الۋ ءۇشىن شەتەلدىك ازاماتتىڭ قازاقستاننان تىس جەردە كەمىندە 3 مىڭ دوللار تۇراقتى تابىسى بولۋى قاجەت. سونداي-اق نەگىزگى كىرىس تالاپتارىنا قوسىمشا, شەتەلدىك ازاماتتارعا مەديتسينالىق ساقتاندىرۋ جانە سوتتالماعانى تۋرالى انىقتاما قاجەت.
شەتەلدىك تۋريستەر وزدەرىنىڭ شەتەلدىك كومپانيالارىندا جۇمىس ىستەي وتىرىپ, قازاقستاندا ءبىر جىلعا دەيىن تۇرا الادى. تۋريزم مينيسترلىگى بۇل ولارعا ەلدىڭ مادەنيەتى مەن ومىرىنە قانىق بولىپ قانا قويماي, قازاقستانعا ەكونوميكالىق پايدا اكەلەتىنىن تۇسىندىرەدى.
ۆيزانى ەنگىزۋدەن تۇسەتىن پايدا ەگەر جىلىنا 500 ادام ۆيزا السا, شامامەن 3,6 ملرد تەڭگەنى قۇرايدى دەپ بولجانعان. Neo Nomad قولدانباسىن پايدالاناتىن شەتەلدىكتەر ىشكى ەڭبەك نارىعىندا جۇمىسقا ورنالاسپاي-اق قازاقستاندا تۇرىپ, اقشا جۇمسايتىن بولادى.
«تۋريزم جانە سپورت, سىرتقى ىستەر, ىشكى ىستەر مينيسترلىكتەرى جانە باسقا دا بىرقاتار مەملەكەتتىك ورگانداردىڭ بىرلەسكەن جۇمىسىنىڭ ناتيجەسىندە قازاقستان «زاماناۋي كوشپەندىلەردىڭ» ساياحات كارتاسىنىڭ ءبىر مۇشەسىنە اينالدى. دۇنيە جۇزىندە ولاردىڭ سانى 35 ميلليوننان اسادى, ءبىز ولاردى ەلىمىزگە تارتۋ ءۇشىن بارلىق جاعدايدى جاساۋدى كوزدەپ وتىرمىز. سونىمەن قاتار الماتى مەن استانا قالالارى «زاماناۋي كوشپەندىلەر» ءۇشىن تارتىمدى 150 قالانىڭ قاتارىنا ەندى», – دەدى تۋريزم جانە سپورت ءمينيسترى ەربول مىرزابوسىنوۆ.
ەسكە سالساق, بۇعان دەيىن قازاقستاندىقتاردىڭ تاعى ءبىر ەلگە ۆيزاسىز بارا الاتىنى تۋرالى جازعان ەدىك.
