«Tabysynan salyq tóleýi kerek»: Sáken Maıǵazıevtyń aqyly «onlaın toıy» komıtettiń nazaryn aýdardy

Belgili ánshi Sáken Maıǵazıevtiń ulynyń úılený toıyn onlaın formatta aqyly túrde kórsetýi salyq zańnamasyna sáıkes tabys kózi retinde qarastyrylady. Bul týraly Memlekettik kirister komıteti málimdedi, dep habarlaıdy Qandastar.kz aqparat portaly.

Bul qazaq qoǵamynda alǵash ret ótkizilgen aqyly onlaın-toı retinde tirkeldi.

«Qaralyp otyrǵan jaǵdaıda onlaın-úılený toıyna qatysý úshin 1380 teńge kóleminde aqy alý tabys tabýǵa baǵyttalǵan kásipkerlik qyzmet bolyp sanalady. Eger sharany uıymdastyrýshy jeke kásipker nemese zańdy tulǵa retinde tirkelse, ol alǵan tabysyn deklaraııalap, jeke tabys salyǵyn tóleýge mindetti», – delingen Komıtet túsindirmesinde.

Iaǵnı, bul tabys zań júzinde salyq salynatyn kiris retinde qaralady.

Eske salaıyq, tanymal ánshi Sáken Maıǵazıev kópshilikti uly Ádilet pen kelini Ádııanyń úılený toıyn onlaın kórýge shaqyrdy.

Uıymdastyrýshylardyń málimetinshe, Ádilet pen Ádııanyń qýanyshyna arnaıy Telegram-arnasy ashylǵan. Toıdy úıinde otyryp-aq tamashalaǵysy keletin jurt osy arnaǵa tirkelip, merekeniń eń jarqyn sátterin kóre alady.

«Ulymyzdyń úılený toıyn sizdermen bólisý úshin arnaıy jabyq Telegram-arnasyn ashtyq. Bul arnada toıdyń erekshe ári qyzyqty sátterin onlaın tamashalaýǵa múmkindik bar. Qýanyshymyzǵa ortaqtasyp, onlaın toıymyzdyń qadirli qonaǵy bolýǵa shaqyramyz», – delingen habarlamada.

Telegram-arnaǵa tirkelip, toıdyń onlaın qonaǵy bolǵysy kelgenderge 1380 teńge tóleý qajet.