تالعارداعى قاندى وقيعادان كەيىن سوگىس العان اۋدان اكىمىنىڭ ورىنباسارى اۋرۋحاناعا ءتۇسىپ قالدى

الماتى وبلىسى تالعار اۋدانى اكىمىنىڭ ورىنباسارى ايبەك بيداەۆتىڭ اۋرۋحاناعا تۇسكەنى بەلگىلى بولدى, دەپ حابارلايدى qandastar.kz   Dalanews.kz-كە سىلتەمە جاساپ.

ايبەك بيداەۆتىڭ اۋرۋحانادا جاتقانىن Ulysmedia.kz دەرەككوزىنە اكىمنىڭ ءباسپاسوز قىزمەتى راستاعان. الايدا اكىم ورىنباسارىنىڭ اۋرۋحاناعا تۇسۋىنە قانداي جاعداي اسەر ەتكەنى تۋرالى اقپارات جوق.

اۋداندىق اكىمدىكتەگى كادر ءبولىمىنىڭ باسشىسى بيداەۆ سىرقاتىنىڭ سەبەبى ەڭبەككە جارامسىزدىق پاراعىن العاننان كەيىن عانا بەلگىلى بولاتىنىن ايتتى.

ايتا كەتەيىك, تالعارداعى تراگەديادان كەيىن تالعار اۋدانىنىڭ اكىمى ايداربەكوۆ تاڭات پەن ونىڭ ورىنباسارى ايبەك بيداەۆقا سوگىس جاريالاندى. 

سونىمەن قاتار تالعار قالاسىنىڭ اكىمى قۋاتبەك ۇلى باحىت كۇرىشبەكوۆ, تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلعانىن جازعان ەدىك.

سونداي-اق “حۋتور” بانداسىنىڭ باسشىسى دەلىنگەن حاسان قاسىمباەۆتىڭ اعاسى تالعار اۋدانى اكىمى اپپاراتىنىڭ باسشىسى اسلان قاسىمباەۆ تا قىزمەتىنەن كەتكەن ەدى.

ەسكە سالايىق, بۇعان دەيىن تالعاردا جاپپاي توبەلەس بولىپ, سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا, ساۋدا نۇكتەسىنە كەلگەن ساتىپ الۋشى سىرا الىپ, اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.

كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليتسيا دەپارتامەنتى قىلمىستىق ءىس قوزعادى.

قازىرگى تاڭدا كىنالى دەپ تانىلعان 7 ادام ۇستالىپ, ۋاقىتشا ۇستاۋ يزولياتورىنا قاماۋعا الىنعان.

15 قازاندا ىشكى ىستەر ۆيتسە-ءمينيسترى تاعى ءۇش كۇدىكتىنى ۇستاعانىن ءمالىم ەتتى.

ال 18 قازاندا تاعى ءبىر كۇدىكتىنى قولعا ءتۇسىردى.

سونىمەن قاتار, الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.

ودان كەيىن شەرزاتتىڭ ۇيىنە كۇزەت قويىلدى.

كوپ ۇزاماي مارقۇم شەرزاتتىڭ ءۇيى ورتەندى.