Talǵardaǵy tragedııa. Marqumnyń ápkesi úndeý jasaǵan aqsaqaldar qaraly otbasyǵa kelmegenin aıtty

Foto: Ulysmedia.kz

Talǵardaǵy tóbeleste qaza tapqan Sherzat Bolattyń ápkesi – marqumnyń ákesiniń qaryndasy Perızat Nurymova aqsaqaldar qazaǵa kúdikti retinde qamaýǵa alynǵandardyń aýyly «Hýtor» týraly, qylmys áleminiń avtorıteti delingen aýyldastary Hasan Qasymbaev týraly beıneúndeý jasaǵansha, nege bizdiń aldymyzǵa kelmeıdi dep ashynady, dep habarlaıdy Qandastar.kz Ulysmedia.kz silteme jasap.

«Árkim ózin aqtap alýǵa quqyly. Kim aýylyn jaman desin. Olarda azamat bar bolsa, er bar bolsa, qaıǵyny túsinip tursa, meniń ákemniń aldyna, baýyrymnyń aldyna keler edi ǵoı. «Aýylymyzdyń balalary osyny istep qoıypty, siz kútken ádil sotty biz de kútemiz» dep aıtar edi. Úndeýde solaı aıtar edi, Topan sýdyń tasýyn, Qańtardy aıtyp áńgime qylmas edi» deıdi Perızat Nurymova.

Ol vıdeodaǵy aqsaqaldardy buryn kórmegenin, olar aldyna kelmegenin atap ótti.

«Ol aýylda aqsaqal joq, qatyn-qalash bıleı me dep qaldym. Bizdi ákeń turyp, balań júgirip shyqpasyn, anań turyp, qyzyń sóılemesin dep tárbıelegen. Al olarda tún jamylyp áıelderi kelip, betin búrkep, júzin jasyryp kelgeni durys emes. Sanasy bolsa, nege jaryq kezde kelmeıdi. Álde ol aýyldyń aqsaqaldary aýylynda turyp, aýylyn maqtaýǵa ǵana shamasy jete me» deıdi ol.

Búgin Talǵar aýdany Rysqulov aýylynda (burynǵy Hýtor) shamamen 60 shaqty adam jınalyp, vıdeoúndeý taratty. Vıdeodaǵy aýyl úlkenderi «aýylymyz uıymshyl, al Hasan osy aýyldyń birligine, tirligine shapqylaıdy. Mektepke kómektesedi. Meshitke de. Shapqylap júrgen jigitti qaralap jatyr» degen.

Sherzat Bolattyń óliminen keıin ustalǵan kúdiktiler dál osy aýyldyń balalary ekeni, olar basynda osy Hasan esimdi adam turǵan qylmystyq topqa jaqyn adamdar ekeni habarlanǵan.

Talǵardaǵy qandy oqıǵa

Eske sala keteıik, Almaty oblysynda jas jigitterdiń tóbelesi 16 jastaǵy jasóspirimniń ólimimen aıaqtalǵan. Marqum dúkende saýda jasap turǵan ákesimen eregesken klıentpen tóbelesken. Buryn taraǵan aqparattarǵa qaraǵanda, klıent dúkennen syra alyp, aqshasyn tólemeı ketpek bolǵan. Tóbeles sol úshin týyndaǵan. Syrany tegin alyp ketpek bolǵan jigit jaqtastaryn shaqyryp, ákesi men balasyn, týys aǵasyn soqqyǵa jyqqan. Bir top jigit jasóspirimdi tepkilep jatqanyn mańaıdaǵy turǵyndar vıdeoǵa túsirip alǵan. 10-shy synypta oqıtyn Sherzat Bolat ata-anasynyń dúkenine kezdeısoq kelgen. Sýyq qarýmen kelgen buzaqylar eshkimdi aıamapty.

Prokýratýra Talǵardaǵy jasóspirimniń ólimine qatysty málimdeme jasap, «ádil tergeýge kepildik beremiz» dep aqparat taratqan. Alaıda tergeýshilerge senbegen marqumnyń týǵan-týystary kóshege shyǵyp, ádildikti talap etti. Olar sol túni bolǵan 13 adamnyń ornyna 7 adamnyń ǵana qamalǵanyna narazylyq bildirdi.

Qaza tapqan jasóspirimniń ákesi beınebaqylaý kamerasynyń jazbasyn áldekimder óshirip tastaǵanyn aıtqan edi. Alaıda IIM ol málimetti joqqa shyǵardy. 9 qazanda depýtat Nartaı Aralbaıuly bas prokýror Berik Asylovqa, ishki ister mınıstri Erjan Sádenovke jáne oqý-aǵartý mınıstri Ǵanı Beısembaevqa depýtattyq saýal joldap, 16 jasar azamatty óltirgen, jaqyndaryn aıaýsyz sabaǵan qylmyskerler qamaýǵa alynyp, olarǵa zańǵa sáıkes ádil jaza berilýi tıis dep másele kóterdi. Al onyń áriptesi Abzal Quspan qylmystyq kodekstiń 201-babyn (sotqa deıingi tergep-tekserý derekterin jarııa etýge jol bermeý) ózgertý kerek dep esepteıdi. Bul qajettilik onyń sózinshe, Talǵardaǵy jasóspirimniń óliminen keıin aıqyn sezilgen.

Ulysmedia.kz kúdiktilerdiń biri taıaýda qylmystyq jaýapkershilikke tartylyp, jazasyn óteýi kerek bolǵanyn, ekinshi kúdikti jaýapkershilikten jaltaryp ketkenin anyqtaǵan edi.

12 qazanǵa qaraǵan túni marqumnyń otbasynyń úıi órtenip ketti. Sherzattyń týystary órtti kúdikti taraptyń áreketimen baılanystyrady. Qaıǵy ústine qaıǵyǵa dýshar bolǵan Nurymov áýletiniń bılikke qoıar eki-aq talaby bar.