تالعاردان شەرزات بولاتتىڭ اعاسىنىڭ دەنەسى تابىلدى

فوتو: Ulysmedia

تالعاردىڭ شەتىندە كامەلەتكە تولماعان ادامدى ءولتىرۋ ىسىمەن بايلانىستى ەر ادامنىڭ دەنەسى تابىلدى, دەپ جازدى qandastar.kz

– تالعار قالاسىنىڭ ماڭىنان 30 جاستاعى ەر ادامنىڭ دەنەسى تابىلدى. الدىن الا مالىمەتتەرگە سايكەس, ول اسىلىپ, ءوز-وزىنە قول سالعان.  مارقۇم بيىل 4 قازاندا قازا تاپقان كامەلەتكە تولماعان شەرزات پولاتتىڭ اعاسى ەكەنى انىقتالدى. وسى فاكتى بويىنشا قىلمىستىق ءىس قوزعالدى. قازىرگى ۋاقىتتا بارلىق جاعدايلاردى انىقتاۋ ءۇشىن تەرگەۋ امالدارى جۇرگىزىلۋدە. وسى ۋاقىتتا قىلمىستىق سيپاتتاعى قانداي دا ءبىر بەلگىلەر انىقتالمادى, – دەلىنگەن پوليتسيا حابارلاماسىندا.

پوليتسيا مارقۇم ش. بولاتتىڭ وتباسى بارلىق ۋاقىتتا پوليتسەيلەردىڭ قورعاۋىندا بولعانىن اتاپ وتەدى.

– وسى ۋاقىتقا دەيىن مارقۇمنىڭ وتباسىنا تونگەن قانداي دا ءبىر قاۋىپ-قاتەر تىركەلگەن جوق. كۇزەتكەن قىزمەتكەرلەردىڭ تۇسىندىرمەلەرىنە سايكەس, ەر ادام كۇزەتىلەتىن وبەكتىدەن ساعات 23:30-دا شىعىپ كەتىپ, جەكە اۆتوكولىكپەن كەتكەنى انىقتالدى. تەرگەۋ مۇددەسى ءۇشىن وزگە دە اقپارات جاريالاۋعا جاتپايدى, – دەلىنگەن حابارلامادا.

شەرزات بولات تاراپىنىڭ ادۆوكاتى سايدا تاۋەكەلوۆا مارقۇمنىڭ اعاسى نۇرقانات عايىپباەۆ كوز جۇمعانىن راستادى. تەلەگرام-ارنالاردا “شەرزات بولاتتىڭ اعاسى توبەلەس كەزىندە قارۋدى ءبىرىنشى الىپ شىققان, سول ءۇشىن ءوزىن ايىپتى سەزىنىپ, ءوز-وزىنە قول سالعان” دەگەن اقپارات تاراعان. ادۆوكات تاۋەكەلوۆا بۇل نۇسقانى تەرىستەدى.