جاڭالىقتار
تاڭعى شىقتىڭ سۋىن ءىشىپ, قامىستى شايناعان: كاسپيدە جوعالعان عالىم 5 كۇننەن كەيىن تابىلدى
فوتو: تاسس
كاسپيدەگى ەلسىز ارالدا جوعالىپ كەتكەن 76 جاستاعى رەسەيلىك عالىم امان-ەسەن تابىلدى, دەپ جازدى qandastar.kz
ايتۋىنشا, ول تىرى قالۋ ءۇشىن تاڭعى شىقپەن قۋاتتانىپ, قامىس شايناعان. بۇل تۋرالى Stan.kz اقپارات اگەنتتىگى TACC باسىلىمىنا سىلتەمە جاساپ حابارلايدى.
استراحان وبلىسىنداعى رەسەي گەوگرافيالىق قوعامى بولىمشەسىنىڭ جەتەكشىسى پەتر بۋحاريتسين قازاقستان شەكاراسىنا جاقىن ورنالاسقان ۋكاتنىي ەلسىز ارالىندا ەكسپەديتسيا كەزىندە جوعالىپ كەتكەن. عالىم كارتوگرافيالاۋ جۇمىستارى كەزىندە جولدان اداسىپ قالعان. 19 ساۋىردەن باستاپ ونى ەرىكتىلەر مەن فەدەرالدى قاۋىپسىزدىك قىزمەتى ىزدەستىرىپ كەلدى. الايدا اۋا رايىنىڭ قولايسىزدىعى مەن وسىمدىكتەردىڭ قالىڭ بولۋى ىزدەۋ جۇمىستارىنا كەدەرگى كەلتىردى. عالىمدى ىزدەگەندە ۇشقىشسىز اپپاراتتى قولدانعان, بىراق قاتتى جەل ىزدەستىرۋ جۇمىستارىن قيىنداتقان.
اراعا بەس كۇن سالىپ بۋحاريتسين ارالدى كەزىپ جۇرگەن جەرىنەن تابىلدى. ول تاڭعى شىقپەن كۇش جيناپ, قامىستى شايناۋمەن بولعان. وكەانولوگ مەديتسينالىق كومەكتەن باس تارتىپ, ءوزىن جاقسى سەزىنەتىنىن ايتتى.
ەسكە سالايىق, بۋحاريتسين قاتىسقان «وپات كەمەلەردىڭ قۇرمەتىنە» اتتى تاريحي-گەوگرافيالىق ەكسپەديتسيا جەڭىستىڭ 80 جىلدىعىنا ارنالدى.
