تانىمال بانكتىڭ جابىلىپ قالۋىنان قازاقستاندىقتار زارداپ شەگە مە?

سالدارىنان, بۇل رەسەي تۇرعىندارى, ءىشىنارا قازاقستاندىقتار اراسىندا ۇلكەن دۇربەلەڭ تۋعىزۋدا. ويتكەنى Qiwi-ءامياندار, Contact ارقىلى اۋدارىمدار بۇعاتتالىپ قالدى. سولتۇستىك كورشىدەگى ونىڭ بارلىق وفيستەرى جاپپاي جابىلدى. كيۆيدىڭ ءموبيلدى بانكى دە جۇمىس ىستەۋىن دوعاردى. كليەنتتەر وزدەرىنىڭ ۆيرتۋالدى ءامياندارىن نە تولتىرا الماي, نە ونداعى قاراجاتتارىن شەشىپ الا الماي, داعدارۋدا.

كاسىپكەر, ينۆەستور الەكساندر ءستولىپيننىڭ تۇسىندىرۋىنشە, رەسەيلىكتەر كيۆي سەرۆيستەرىن اقشا اۋدارىمدارىن الۋ, قۇزىرلى قۇرىلىمداردان جاسىرىن كريپتوۆاليۋتالار جانە باسقا دا اكتيۆتەر ساتىپ الۋ ءۇشىن پايدالاناتىن.

سوندىقتان كاسىبي فورۋمداردا ساۋالناماعا جاۋاپ بەرگەن ساراپشىلاردىڭ جانە پايدالانۋشىلاردىڭ 61,3%-ى «Qiwi-بانكتىڭ جابىلۋىنىڭ شىن سەبەبى» رەتىندە «رەسەيدەن اقشا شىعارۋدىڭ باقىلانبايتىن جولىنا توسقاۋىل قويۋ تالابىن» اتادى. تاعى 37,14%-ى رەسەيدىڭ بانك سەكتورىندا اكتيۆتەردى قايتا ءبولىس باستالدى دەپ سانايدى. 5,71%-ى «كريپتورۋبلدى ەنگىزۋگە دايىندىق جاسالۋدا» دەگەن بايلام جاسادى. تەك 28%-ى عانا رەسمي سەبەپتەرگە سەنەدى.

رەسەي ورتالىق بانكى ليتسەنزيانى كەرى الۋعا اتالعان قارجىلىق ۇيىمنىڭ بانك قىزمەتىن رەتتەيتىن فەدەرالدىق زاڭداردى بۇزۋى سەبەپ بولدى دەپ, قىسقاشا قايىردى.

«بۇل بانك ەكونوميكانىڭ ناقتى سەكتورىنىڭ ەلەۋلى كرەديتورى بولىپ تابىلمايدى. كيۆي بانكتىڭ قىزمەتىن توقتاتۋ ازاماتتاردىڭ, كاسىپكەرلەردىڭ جانە زاڭدى تۇلعالاردىڭ ەسەپ ايىرىسۋ, اۋدارىم جاساۋ, سونىڭ ىشىندە شوت اشپاي اقشا اۋدارۋ مۇمكىندىكتەرىنە ايتارلىقتاي ىقپال ەتپەيدى. ولاردىڭ ءبارىن وزگە كرەديتتىك ۇيىمدار مەن تولەم جۇيەلەرى ارقىلى جۇزەگە اسىرۋعا بولادى», – دەپ تۇسىنىكتەمە بەردى رەسەيدىڭ ۇلتتىق بانكى.

وتانىن تارك ەتىپ, شەتەلگە قونىس اۋدارعان رەسەيلىكتەرگە كومەكتەسىپ كەلگەن بانكتى باقىلاۋعا كوندىرۋ ءۇشىن ماسكەۋ بىلتىردان ءبىرتالاي تالاپتاندى. كەيىنگى 12 ايدا 5 رەت شارا قابىلداعان, سونىڭ ىشىندە ەكى رەت جەكەلەگەن وپەراتسيالاردى ىسكە اسىرۋىنا شەكتەۋ قويدى. الايدا كيۆي بانك ايتقانعا ەرىپ, ايداعانعا جۇرمەپتى.

بۇل «قيقارلىقتى» رەسەي بانكى «تاۋەكەلدەردى تومەندەتۋ ءۇشىن پارمەندى شارا قابىلدامادى جانە تاۋەكەلدىلىگى جوعارى وپەراتسيالاردى جۇزەگە اسىرۋىن جالعاستىردى» دەپ باعالادى. قارجىلىق رەتتەۋشى «كيۆي بانك ەكسترەميزمدى, تەرروريزمدى قارجىلاندىرۋ, قىلمىستىق جولمەن الىنعان تابىستاردى زاڭداستىرۋ سالاسىنداعى فەدەرالدىق زاڭناما تالاپتارىن جۇيەلى بۇزۋعا جول بەردى» دەپ وتىر.

بىراق رەسەيدە Facebook, Instagram, لگبت قوزعالىسى جانە باسقالارى دا «تىيىم سالىنعان ەكسترەميستىك ۇيىمدار» رەتىندە تانىلعان.

«بۇل بانكتىڭ قىزمەتى جەكە تۇلعالار مەن كولەڭكەلى بينەس اراسىنداعى ەسەپتەسۋلەردى قامتاماسىز ەتۋگە باعىتتالعان جوعارى تاۋەكەلدى وپەراتسيالار جۇرگىزۋگە تارتىلدى. سونىڭ ىشىندە ول كريپتوايىرباستاۋ ارقىلى اقشا اۋدارىمدارىن جۇرگىزدى. زاڭسىز ونلاين-كازينو, بۋكمەكەرلىك كەڭسەلەرگە سول ارقىلى اقشا اۋدارىلدى. سونداي-اق ول رەسەيلىكتەرگە رەتتەۋشى ەنگىزەتىن شەكتەۋلەردى اينالىپ ءوتۋدىڭ جاڭا تاسىلدەرىن ىزدەۋگە سەپتەستى», – دەپ ايىپتادى رەسەي ورتالىق بانكى.