تانىمال سۋرەتشى يبراگيم كۋبەكوۆ دۇنيە سالدى

2025 جىلعى 2 ماۋسىمدا تانىمال قازاقستاندىق گرافيك-سۋرەتشى, كاريكاتۋراشى يبراگيم كۋبەكوۆ قايتىس بولدى, دەپ حابارلايدى Qandastar.kz اقپارات پورتالى.

بۇل تۋرالى 3 ماۋسىم كۇنى ونىڭ ۇلى ەۆگەني كۋبەكوۆ Facebook پاراقشاسىندا جازدى:

«كەشە بۋرگاس قالاسىندا اكەم يبراگيم كۋبەكوۆ ومىردەن ءوتتى دەگەن قايعىلى حاباردى جەتكىزەمىن», – دەپ جازدى ول.

يبراگيم كۋبەكوۆ — قازاقستاندىق سۋرەتشى-گرافيك, كاريكاتۋراشى, باسپاگەر. 1957 جىلى ۋكراين كسر-ءىنىڭ ۆوروشيلوۆگراد (قازىرگى لۋگانسك) قالاسىندا دۇنيەگە كەلگەن. 1960-جىلداردىڭ باسىنان باستاپ الماتى قالاسىندا ءومىر ءسۇرىپ, ەڭبەك ەتتى. 1978–1982 جىلدارى اباي اتىنداعى قازاق پەداگوگيكالىق ينستيتۋتىنىڭ كوركەمسۋرەت-گرافيكا فاكۋلتەتىندە ءبىلىم الدى.

1980-جىلداردىڭ سوڭىنان باستاپ قىرىق جىلعا جۋىق مەرزىم بويى گازەت گرافيكاسى سالاسىندا جۇمىس ىستەدى. ونىڭ شارجدارى مەن كاريكاتۋرالارى «درۋجنىە رەبياتا», «كاراۆان», «مەگاپوليس», «كوۆچەگ», «ينفورمبيۋرو» سىندى باسىلىمداردا جارىق كوردى. كسرو جانە حالىقارالىق كاريكاتۋرا بايقاۋلارىنا قاتىسىپ, جۇلدەگەر اتاندى. شىعارمالارى قازاقستاننىڭ ءىرى مۋزەيلەرى مەن كورمە زالدارىندا قويىلعان.